Башар Асад қочишдан олдин ҳарбийларни Россиядан ёрдам келаётганига ишонтирган

^{Фото: Reuters}
Сурия собиқ президенти Башар Асад қочиб кетишдан аввал ўзига яқин бўлганларни Россия ҳарбий ёрдами келаётганига ишонтирган ва ҳатто қариндошларига ҳам хабар бермасдан аэропортга яширинча жўнаб кетган. Бу ҳақда Reuters ёзди.

Асад қочиб кетишидан бир неча соат олдин Мудофаа вазирлигида 30 нафарга яқин армия ва хавфсизлик етакчиларини йиғиб, мажлис ўтказган. Собиқ президент уларни Россия ҳарбий ёрдами йўлда эканлигига ишонтириб, қуруқликдаги ҳарбий кучларни позицияларни ушлаб туришга чақирган. Reuters ушбу йиғилишда иштирок этган қўмондонлардан бирига таянмоқда.

Асад президент девонидаги бошқарувчига уйга кетаётганини айтган, лекин яширинча аэропортга йўл олган. Асад ўз матбуот котибини баёнот тайёрлаш учун уйига чақирган. Матбуот котиби етиб келгач, у ерда ҳеч ким йўқлигини кўрган.

Асад Россияга кетаётганини ҳатто элита дивизия қўмондони, укаси Моҳирга ҳам айтмаган. Кейинчалик Моҳир вертолётда Ироққа қочган, у ердан Россияга учган. Асад, шунингдек, амакиваччалари Иҳоб ва Иёз Махлуфни ҳам ташлаб кетган. Тасдиқланмаган маълумотларга кўра, Иҳоб ўлдирилган, Иёзнинг тақдири номаълум.

Асаднинг ўзи Дамашқдан Россиянинг Лазқиядаги Хмеймим базасига транспондери ўчирилган самолётда учган. У ердан Москвага учиб кетган. Reuters манбаларига кўра, унинг рафиқаси Асмо ва уч фарзанди ўша пайтда аллақачон Москвада бўлган ва Асаднинг келишини кутишган.

Исёнчилар ва аҳоли томонидан Асаднинг саройидан олинган видеоларда унинг уйдан шошиб чиқиб кетганига ишоралар бор, хусусан, қозонда қолган тайёр овқат ва сочилиб ётган оилавий фотоалбомлар каби шахсий буюмлари. “Замин” янгиликларини “Twitter”да кузатиб боринг