Озарбойжон Россия фуқароларининг мамлакатда бўлиш қоидаларига ўзгартириш киритади

Озарбойжон яқин кунларда Россия фуқароларининг мамлакат ҳудудида вақтинча бўлиш қоидаларига ўзгартириш киритади. Бу ҳақда АПА агентлиги мамлакат ТИВ матбуот котиби Ойхон Ҳожизодага таяниб хабар берди.

Унинг сўзларига кўра, бу каби қарор Россия томони чет эл фуқароларининг мамлакатда бўлиш муддатига боғлиқ талабларни кучайтиргани сабаб қабул қилинган.

ТИВ вакилининг айтишича, Москва томонидан қўлланаётган янги қоидалар Озарбойжон фуқароларининг ҳуқуқлари контекстида кўриб чиқилмоқда. Шу боис Боку паритет ва ўзаролик тамойилларидан келиб чиқади.

ТИВ қоидаларга қандай ўзгартириш киритилаётгани юзасидан маълумот бермаган.

Россия фуқаролари Озарбойжонга визасиз кира олади. Чет эл фуқаролари ёки фуқаролиги йўқ шахсларнинг вақтинча мамлакатда бўлиш муддати 90 кундан ошмаслиги керак.

Россияда 2025 йил 1 январдан виза талаб этилмайдиган давлатдан келган чет эл фуқаросининг мамлакатда бўлиш муддати бир календар йили давомида жами 90 суткадан ошмаслиги тўғрисидаги тартиб-қоида кучга киради.

26 декабр куни Озарбойжон парламенти депутати Расим Мусабеков Россия Бокудан Грознияга учаётган Azerbaijan Airlines авиакомпаниясининг Embraer самолёти Қозоғистонда ҳалокатга учрагани учун кечирим сўраши кераклигини маълум қилди. РФ президенти матбуот котиби Дмитрий Песков Кремл Бокунинг баёнотидан хабардор экани, аммо ҳалокат сабабларини аниқлаш бўйича тергов якунланмагунга қадар «баҳо бериш ҳуқуқига эга эмаслигини» билдирди. “Замин” янгиликларини “Telegram”да кузатиб боринг