Саудия Арабистони ҳукумати Умра зиёратига келувчи зиёратчилар учун менингитга қарши мажбурий эмлаш талабини расман бекор қилди. Бу ҳақда мамлакатнинг Фуқаро авиацияси бошқармаси (GACA) барча авиакомпанияларга юборган кўрсатмаси орқали маълум қилди.
Мазкур қарор Умра сафарига отланишни режалаштираётган зиёратчилар учун катта қулайлик яратиши аниқ. Аввалроқ, Саудия ҳукумати 2025 йил 1 февралдан бошлаб, мамлакатга ташриф буюрувчи барча зиёратчилардан менингитга қарши эмланганлик тўғрисидаги сертификатни талаб қилиш тартибини жорий этган эди. Шу талабга кўра, эмлаш Саудия Арабистонига жўнаб кетишдан камида 10 кун ва кўпи билан 3 йил олдин амалга оширилиши шарт эди.
Бироқ янги қарорга мувофиқ, эндиликда мазкур чеклов кучини йўқотди. Бу эса зиёратчиларга ташкилий ишлар ва тиббий расмийлаштириш жараёнини анча енгиллаштиради.
Саудия ҳукумати Умра зиёрати учун белгиланган тартиблар ва талаблар бўйича янгиланган маълумотларни ўзининг расмий веб-сайти ҳамда дипломатик каналлар орқали эълон қилишда давом этмоқда.
Зиёратчиларга қулайлик яратишга қаратилган ушбу ўзгариш мамлакатнинг ҳаж ва Умра зиёратларини янада осонлаштиришга бўлган интилишини кўрсатади. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
