Украина дронлари Туапсе денгиз портига ҳужум қилди

^{Фото: SERGEI SUPINSKY/AFP}
Украина учувчисиз учоқлари 26 феврал, чоршанбага ўтар кечаси Краснодар ўлкасига ҳужум қилди. Гувоҳларнинг сўзларига кўра, нишон Қора денгиз соҳилидаги Туапсе порти бўлган.

Россия ҳукумати Украина қуролли кучларининг учувчисиз учоқлари тинч аҳоли нишонларига ҳужум қилгани ҳақида эълон қилди. Губернатор Вениамин Кондратев Telegramʼда Туапсе ва Темрюк районида хусусий уйлар шикастлангани, бироқ қурбонлар йўқлигини маълум қилди.

Шаҳар аҳолиси ижтимоий тармоқларда Туапсе денгиз портига қилинган ҳужум ҳақида ёзмоқда, портлашлар акс этган видеоларни жойлаштирмоқда. Видеолардан бирида бузилган турар жой биноси акс этган.

Анапа узра портлашлар

Россия Telegram-каналлари Анапа осмонида ҳам ҳаво ҳужумидан мудофаа кучлари ишлаётгани тахмин қилинаётган портлашлар ҳақида хабар бермоқда. Сочи аэропортида «Ковер» режаси жорий этилди, рейсларни қабул қилиш ва жўнатиш вақтинчалик тўхтатилди.

Қримнинг Россия томонидан тайинланган «ҳокимияти» ҳам УУА ҳужуми ҳақида хабардор қилган. Қора денгиз узра тўртта дрон уриб туширилди.

Айни вақтда Россия Мудофаа вазирлиги Россия, Қрим ҳамда Қора ва Азов денгизлари акваторияси устида 128 та учувчисиз учиш аппарати йўқ қилингани ҳақида хабар берди. «Краснодар ўлкаси ҳудудида 83 та УУА, Қрим Республикаси ҳудудида 30 та УУА, Азов денгизи сувларида саккизта, Қора денгиз сувларида бешта, Брянск ва Курск областлари ҳудудларида биттадан УУА уриб туширилди», — дейилади идора хабарида. “Замин” янгиликларини “Telegram”да кузатиб боринг