Доналд Трамп Зеленскийни диктатор деб атаганига «ишонмаяпти»

^{Фото: Yuri Gripas/Pool via CNP/AdMedia/picture alliance}
Доналд Трамп 27 феврал, пайшанба куни Володимир Зеленский «диктатор» экани ҳақидаги аввалги фикридан қайтди. «Мен шундай дедимми? Ишонмайман. Кейинги савол», — деб жавоб берди АҚШ президенти Оқ уйда Британия бош вазири Кир Стармер билан учрашувда журналистнинг саволига.

19 феврал куни Трамп ўзининг Truth Social платформасидаги постида Украина президенти ўз мамлакатида «сайлов ўтказишдан бош тортгани» учун «сайловларсиз диктатор» эканини ёзган. «Зеленский шошилса яхши бўлади, акс ҳолда унинг мамлакати қолмайди», деб қўшимча қилди Америка раҳбари. Ўша куни Доналд Трамп Майамидаги митингда нутқ сўзлаб, бу баёнотни такрорлади.

24 феврал куни АҚШ президенти Владимир Путинни диктатор деб аташ мумкинми, деган саволга жавобан: «Мен бундай сўзларни ўйламасдан туриб ишлатмайман», деди ва Россия раҳбарини бундай деб атамади.

Трампнинг баёнотлари танқид қилинди

Оқ уй раҳбарининг баёнотлари Украинада ҳам, хорижда ҳам танқид қилинди. Хусусан, Германия канцлери Олаф Шолц АҚШ президентининг сўзларини «хато ва хавфли» деб атади. «Ҳақиқат шуки, Володимир Зеленский Украина давлатининг қонуний сайланган раҳбари ҳисобланади. Уруш шароитида тўғри сайловлар ўтказишнинг иложи йўқлиги Украина Конституцияси ва сайлов қонунчилиги қоидаларига тўғри келади. Ва бунинг аксини даъво қилишга ҳеч кимнинг ҳаққи йўқ», — дея таъкидлади Германия ҳукумати раҳбари.

Еврокомиссия Трампнинг Зеленскийга оғзаки ҳужумига изоҳ берди: «Бизда бу масала бўйича аниқ позиция бор: президент Зеленский эркин, адолатли ва демократик сайловларда қонуний равишда сайланган. Украина демократик давлат, Путин Россияси эса ундай эмас». Бирлашган Миллатлар Ташкилоти, шунингдек, Володимир Зеленский «тўғри ўтказилган сайловлардан сўнг ўз лавозимида» эканлигини тасдиқлади. “Замин” янгиликларини “Telegram”да кузатиб боринг