Трамп Зеленскийдан қандай мактуб олганини айтди

АҚШ президенти Доналд Трамп Конгресснинг иккала палатасига мурожаатида Украина президенти Володимир Зеленскийдан тинчлик музокараларига тайёрлигини билдирувчи мактуб олганини айтди. Унинг сўзларига кўра, Россия томондан ҳам тинчликка тайёрлик ҳақида сигналлар келган.

У мактубдан парчалар келтирди, улардан Зеленский ва унинг жамоаси «мустаҳкам тинчликни яқинлаштириш учун имкон қадар тезроқ музокаралар столига ўтиришга тайёрлиги, ҳеч ким тинчликни украинлардан кўра кўпроқ хоҳламаслиги» айтилган.

«Менинг жамоам ва мен президент Трампнинг кучли раҳбарлиги остида барқарор тинчликка эришиш учун ишлашга тайёрмиз», – дея мактубдан яна бир иқтибос келтирган Трамп.

Унинг сўзларига кўра, Зеленский, шунингдек, «исталган вақтда» фойдали қазилмалар бўйича келишувни имзолашга тайёрлигини билдирган.

«Шу билан бирга, биз Россия билан жиддий музокаралар олиб бордик ва улар тинчликка тайёр экани ҳақида кучли сигналлар олдик», деб қўшимча қилган Трамп.

Володимир Зеленский сешанба куни Овал кабинетда Трамп билан тортишуви юзасидан изоҳ бериб, музокаралар столига ўтиришга тайёрлигини маълум қилганди. Шунингдек, у аввалроқ Украина ерости бойликлари бўйича келишувни имзолашга тайёрлигини айтганди.

«Мен Украинадаги шафқатсиз можарони тугатиш учун тинимсиз ишлаяпман, – деди Трамп. – Охири кўринмаётган бу даҳшатли ва шафқатсиз тўқнашувда миллионлаб украинлар ва руслар беҳуда ҳалок бўлди ёки яраланди. АҚШ Украина мудофаасини қўллаб-қувватлаш учун юзлаб миллиард доллар юборди».

«Сиз бу яна беш йил давом этишини хоҳлайсизми?» – дея савол қўйди Трамп ва яна бир бор АҚШ Украинани қўллаб-қувватлаш учун Европадан кўра кўпроқ маблағ сарфлаганини айтиб ўтди.

«Афсуски, Европа Украинани ҳимоя қилишдан кўра Россия нефти ва газини сотиб олишга кўпроқ пул сарфлади. Бу ҳақда ўйлаб кўринглар».

Трамп Украина ҳақида гапирганида баъзи демократлар зални тарк этишди. АҚШ президенти ўз нутқида Киевга ҳарбий ёрдам тўхтатилиши ҳақида гапирмади.

^{Демократ Эл Гринни Трамп нутқи бошида залдан олиб чиқишди. Фото: Reuters}
Бу Трампнинг Оқ уйга қайтганидан кейин Конгрессдаги биринчи нутқи эди. Бу анъанавий тадбир бўлиб, унда президент ўз ваколатларининг дастлабки бир неча ҳафтасини сарҳисоб қилади. Доналд Трамп бу лавозимда 44 кун, яъни олти ҳафтадан сал кўпроқ вақт ўтказди.

2017 йилда Трамп Конгрессда роппа-роса бир соат нутқ сўзлаганди, бу сафар у 1 соат 40 дақиқа гапирди, унинг нутқи тарихдаги энг узуни бўлди.

«Америка қайтди», – деди у чиқиши аввалида.

У ўз маъмурияти бир неча ҳафта ичида ҳеч бир маъмурият йиллар давомида эриша олмаган натижаларга эришгани ҳақида гапирган.

«Америка орзусини тўхтатиб бўлмайди ва мамлакатимиз дунё ҳеч қачон кўрмаган ва, эҳтимол, ҳеч қачон кўрмайдиган қайтиш арафасида турибди», деди Трамп.

Демократик партия вакиллари норозилик билдиришни ва Трампга ҳуштакбозлик қилишни бошлади, натижада Вакиллар палатаси спикери Майк Жонсон барчани тартибга чақирди ва нутқни бузишга уринганларни залдан чиқариб юбориш билан таҳдид қилди.

Демократик конгрессмен Эл Грин эса ўз ўрнини эгаллашдан бош тортганида, Жонсон «бу жанобни залдан олиб чиқиб кетиш»ни талаб қилди. Шундан сўнг Трамп нутқини давом эттирди.

Унинг нутқини кўп марта республикачи тарафдорларининг қарсаклари бўлб турди – улар партия етакчисини тик турган ҳолда олқишлашди, бу вақтда эса демократлар ўринларидан туришмади.