Трамп Россиянинг илтимосига кўра Кит Келлогни музокаралардан четлатди

NBC News манбаларига кўра, АҚШ президенти Доналд Трамп Россия ва Украина ўртасидаги урушни ҳал қилиш бўйича олий даражадаги музокаралардан Кит Келлогни четлатди. Бу қарор Россия президенти Владимир Путиннинг талаби билан боғлиқ бўлиши мумкин. Путин Келлогни «украинапараст» деб ҳисоблаб, уни музокара жараёнидаги иштирокини номақбул деб топган.

Журналистларнинг маълум қилишича, Кит Келлог Саудия Арабистонида Россия ва Украина делегациялари билан ўтказилган сўнгги музокараларда қатнашмаган. Ҳолбуки, бу унинг ваколати доирасига кириши керак эди. NBC Россия мулозимларидан иқтибос келтирган ҳолда, Келлог Украинага жуда яқин бўлган собиқ америкалик генерал эканини таъкидлаган.

Келлог: АҚШ Россия билан муносабатларни қайта тикламоқчи

Кит Келлогнинг фикрига кўра, Вашингтон Москва билан мулоқотни тиклашга интилиши керак, чунки Украинадаги уруш шароитида изоляция сиёсати самарасиз бўлиб қолган. 6 март куни у Вашингтондаги Ташқи алоқалар кенгашида чиқиш қилиб, АҚШ миллий манфаатларини ҳимоя қилиш учун Россия билан муносабатларни қайта тиклаш зарурлигини таъкидлади.

"Сиз ҳозир гувоҳ бўлаётган жараён Трамп маъмуриятининг тинчлик келишувига эришиш мақсадида ҳар икки томонни музокаралар столига олиб келишга қаратилган шошилинч ҳаракатларидир", — деди Келлог.

Унинг сўзларига кўра, Оқ уй ҳар икки томонга босим ўтказиш орқали урушни тугатишга интилаяпти. Россияга нисбатан бундай босимлар орасида Трамп маъмурияти томонидан Россия Федерациясининг «соядаги флоти»га қарши киритилган санкциялар ҳам бор. Шунингдек, Келлог Трампнинг Россияга нисбатан бошқа стратегик босим воситалари сифатида қуйидагиларни санаб ўтди:

• Украинани қайта тиклаш учун музлатилган Россия активларини тортиб олиш;
  
• Россия энергетика соҳасига максимал босим ўтказиш.
  

Кит Келлогнинг музокаралардан четлатилиши Трамп маъмуриятининг Россия ва Украина ўртасидаги урушни ҳал қилиш бўйича стратегиясидаги муҳим бурилишлардан бири ҳисобланади. Россия томони унинг музокараларда иштирок этишини номақбул деб ҳисоблагани учун Трамп уни четлатишга мажбур бўлган. Шу билан бирга, Трамп ҳукумати урушни тугатиш мақсадида ҳам Россия, ҳам Украинага босим ўтказишни давом эттирмоқда. “Замин” янгиликларини “Telegram”да кузатиб боринг