Кривий Ригдаги ҳужумда 56 киши яраланди, уйлар ва машиналар вайрон бўлди

2025 йил 4 апрел, жума куни Россия Кривий Риг шаҳрига янги ракета зарбасини амалга оширди. Ҳужум оқибатида камида 19 киши ҳалок бўлди, улардан 9 нафари бола. Бу ҳақда Кривий Риг мудофаа кенгаши раиси Александр Вилкул шу куни тун яримда маълум қилди. Ҳужумда яна 56 киши жароҳат олган.

Бир нечта манбаларга кўра, ракета "Магеллан" ресторани яқинида портлаган.

Днипропетровск вилояти маъмурияти раҳбари Сергей Лисакнинг айтишича, шаҳарда 20 га яқин кўп қаватли уй, 30 дан ортиқ машина, таълим муассасалари ва умумий овқатланиш жойлари зарар кўрган.

Украина президенти Володимир Зеленский ҳужумга муносабат билдирди: «Россия ҳар куни зарба беради. Ҳар куни одамлар ҳалок бўлмоқда. Бунинг сабаби фақат битта – Россия ўт очишни тўхтатишни истамаяпти ва биз буни кўриб турибмиз. Бутун дунё ҳам шунга гувоҳ. Ҳар бир ракета, ҳар бир дрон Россиянинг урушни давом эттириш нияти борлигини исботлайди», – деб ёзди у. Зеленскийга кўра, зарба турар жойлар мавжуд ҳудудга берилган.

Бундан бир кун олдинги ҳужумда камида 4 киши ҳалок бўлган, яна 14 киши яраланган эди. “Замин” янгиликларини “Telegram”да кузатиб боринг