Покистон 80 мингдан ортиқ афғон муҳожирини депортация қилди

Покистон ҳукумати 1 апрелдан бошлаб мамлакатда ноқонуний яшаган 80 мингдан ортиқ афғон муҳожирини ватанларига қайтарганини тасдиқлади. Афғонистон ҳукумати бу жараённи "мажбурий депортация" деб баҳоламоқда. Бу ҳақда халқаро оммавий ахборот воситалари хабар бермоқда.

Бу ҳаракат Покистон ҳукумати томонидан амалга оширилган муҳожирларни чиқариб юбориш режаси доирасида бўлиб, унга кўра 2023 йил охиригача 3 миллиондан зиёд афғон фуқароси Покистон ҳудудидан чиқарилиши керак.

Покистон Ички ишлар вазирлиги маслаҳатчиси Талал Чаудҳрининг маълум қилишича, афғон муҳожирлари учун муддат энди узайтирилмайди.

"Ҳамма вилоятларга аниқ кўрсатмалар берилди: ноқонуний муҳожирларга дўкон, уй ёки бошқа турар-жой тақдим қилган шахслар қонун олдида жавоб беради", деди Чаудҳри.

Дастлаб амалдаги ҳужжатларга эга бўлмаган афғон муҳожирлари 31 мартгача мамлакатни тарк этиши керак эди, кейинчалик бу муддат 30 апрелгача узайтирилган эди. Халқаро миграция ташкилоти эса, апрель ойининг бошидан буён Покистон томонидан 60 мингга яқин афғон депортация қилинганини маълум қилди.

Шу билан бирга, Германия ҳукумати Исломобод шаҳрида жойлашган, аҳолининг заиф қатламига кирувчи 138 нафар афғон фуқаросини қабул қилганини ҳам хабар қилган эди.

Шунингдек, Эрон ҳам қонуний ҳужжатларга эга бўлган афғон фуқароларини ҳам полиция томонидан ҳибсга олиб, депортация қилаётгани ҳақида хабарлар тарқалган.

Муҳим: кимлар хавф остида?
- Ҳужжатсиз муҳожирлар,
- “Афғонистон картаси”га эга бўлмаганлар,
- Кўчаларда, бозорларда вақтинча ишлаётган муҳожирлар,
- Уларга турар жой берган маҳаллий фуқаролар ҳам жавобгарликка тортилади.

Сиз нима деб ўйлайсиз: муҳожир муаммосини бундай мажбурий чоралар билан ҳал этиш мумкинми? «Замин»ни Telegram’да ўқинг!