Марҳум Рим папаси Францискнинг сўнгги нутқи ошкор қилинди

Марҳум Рим папаси Франциск 20 апрель, Пасха куни Ватикандаги Пётр майдонида халқ олдида чиқиш қилди. Бу унинг умридаги охирги нутқи бўлди. Vatican News нашрининг хабар беришича, нутқида понтифик ўзига кўмаклашганларга самимий миннатдорлик билдирди.

Қайд этилишича, Франциск ҳаётининг сўнгги кунида ёрдамчиси Массимилиано Страппеттидан Пётр майдонига йиғилган одамлар билан учраштиришини сўраган. Понтифик автомобилда майдонни айланиб, одамлар билан саломлашмоқчи бўлган.

Бироқ нутқидан сўнг, якшанба оқшомида унинг саломатлиги кескин ёмонлашди. Тахминан бир соат ўтиб, понтифик комага тушди.

Франциск ёрдамчиларига "Мени майдонга олиб келганингиз учун ташаккур", деб айтган. Папанинг ёрдамчилари унинг сўнгги дақиқаларда азоб чекмаганини таъкидлашди.

Ватикан аввалроқ папанинг дафн маросими 26 апрель, шанба куни Санта Мария Мажора базиликасида бўлиб ўтишини маълум қилган эди.

23 апрелдан бошлаб, Францискнинг жасади билан видолашиш маросими Пётр соборида бўлиб ўтади ва бу маросим уч кун давом этади. 26 апрель куни ўтказиладиган асосий дафн маросимини Кардиналлар коллежи декани Жованни Баттиста Ре олиб боради. Маросимда бутун дунёдан патриархлар, кардиналлар, архиепископлар, епископлар ва руҳонийлар иштирок этади.

Reuters ахборотига кўра, дафн маросимига АҚШ президенти Дональд Трамп рафиқаси Мелания билан бирга, шунингдек, Аргентина президенти Хавьер Майли ва Бразилия президенти Луис Инасиу Лула да Сильва ташриф буюради. Агентликка кўра, Украина президенти Владимир Зеленский ҳам маросимда иштирок этиши кутилмоқда.

Россия президенти Владимир Путин эса маросимга ташриф буюришни режалаштирмаган. Унинг матбуот котиби Дмитрий Песковнинг маълум қилишича, Россия Федерациясини ким вакиллик қилиши ҳали аниқ эмас.

Эслатиб ўтамиз, 14 февралдан 23 мартгача Франциск иккиламчи пневмония ташхиси билан касалхонада ётганди. Унинг аҳволи оғир бўлган, ҳатто унга қон қуйилган. Февраль ойи охирида понтифик сунъий нафас олиш аппаратига уланган эди. «Замин»ни Telegram’да ўқинг!