Трамп жамоаси учинчи импичмент хавфига тайёргарлик кўрмоқда

АҚШ президенти Дональд Трампнинг маслаҳатчилари 2026 йил ноябрида бўлиб ўтадиган оралиқ сайловлардан кейин, агар демократлар Вакиллар палатасида кўпчилик ўринни қўлга киритса, унга қарши учинчи марта импичмент эълон қилиниши мумкинлигини ҳисобга олиб, тайёргарлик кўрмоқда. Бу ҳақда Axios нашри хабар тарқатди.

Маълум бўлишича, Трамп маъмурияти импичмент таҳдиди пайдо бўлгунча ўз таклиф ва лойиҳаларини Конгресс орқали имкон қадар тезроқ амалга оширишга ҳаракат қилади. Айниқса, асосий мақсадлардан бири – солиқларни пасайтириш бўлади.

Ҳозирда Вакиллар палатаси республикачилар томонидан назорат қилинаётган бўлса-да, оралиқ сайловлар натижасига кўра бу вазият ўзгариши мумкин. Шу сабабдан, демократлар аллақачон Трампга қарши учинчи марта импичмент жараёни бошлашга тайёр эканликларини билдириб келишмоқда. Хусусан, Мичиган штатидан бўлган конгрессмен Шри Танедар 28 апрель куни бу ҳақда очиқчасига маълум қилган.

Трампнинг сайлов кампанияси раҳбари Жон Маклафлин, сайловларга қадар маъмурият учун энг асосий вазифа иқтисодий барқарорликни таъминлаш эканлигини қайд этди: «Биз солиқларни камайтириш ва иқтисодий рецессиядан қочишимиз шарт».

АҚШ Молия вазири Скотт Бессент ҳам олдинроқ оралиқ сайловлардан сўнг импичмент хавфи ҳақида гапирган эди: «Агар оралиқ сайловларда ютқазсак, демократлар дарҳол бизга қарши бирор сабаб топиб, импичмент эълон қилишга шошилишади».

Маълумки, Трамп АҚШ тарихида икки марта импичмент эълон қилинган ягона президент ҳисобланади. Шу боис Axios нашрининг таъкидлашича, президент ва унинг маслаҳатчилари бу жараён қанчалик оғир ва мураккаб бўлишини яхши билишади.

Бироқ, Трампнинг яқин маслаҳатчиларидан бири, президентнинг импичмент жараёнига нисбатан ёндашуви ўзгарганини айтиб ўтди: «Оҳ, яна импичментми? Улар буни икки марта эълон қилишди ва натижага эришолмади. Демак, бу ҳолатдан яна ўтиш мумкин», деб жавоб қайтарган.

Маълумот учун, АҚШ президентига импичмент эълон қилиниши учун Вакиллар палатасида оддий кўпчилик овоз талаб этилади, лекин президентни лавозимидан четлатиш учун 100 нафар сенатордан 67 нафари овоз бериши лозим. Бундай ҳолат эса АҚШ тарихида ҳеч қачон рўй бермаган. «Замин»ни Telegram’да ўқинг!