Доналд Трамп президентлик муддати ҳақида якуний қарорини айтди

АҚШнинг 45-президенти Доналд Трамп Оқ уйда фақатгина икки муддат фаолият юритиш нияти борлигини маълум қилди. У бу ҳақда NBC телеканали журналистлари билан бўлган интервьюда айтиб ўтди.

Сўнгги пайтларда оммавий ахборот воситаларида ва ижтимоий тармоқларда Трампнинг учинчи муддатга номзод бўлиши мумкинлиги ҳақида турли тахминлар пайдо бўлган эди. Айниқса, апрель ойида президент билан боғлиқ бўлган Trump Organization компанияси "Trump 2028" ёзуви туширилган махсус қизил кепкаларни сотувга чиқарганидан кейин ушбу миш-мишлар янада кучайганди.

Бироқ президент ўзининг учинчи муддатга номзод бўлиш эҳтимолини рад қилди. «Мен саккиз йил президент бўламан, икки муддат хизмат қиламан. Мен учун бу доимо жуда муҳим бўлган. Кўп одамлар учинчи муддатга номзод бўлишимни сўрашмоқда, бу илтимосларнинг сони илгари ҳеч қачон бунчалик кўп бўлмаган. Аммо мен биламанки, бу қонунан мумкин эмас ва мен буни қилмайман», — деди Трамп.

Трамп ўз суҳбатида президентликдаги қолган муддатини «тўрт ажойиб йил» деб атаб, унинг якунида ҳокимиятни муносиб шахсга, айниқса «буюк республикачи»га топшириш режаси борлигини таъкидлади.

Шу билан бирга, "Make America Great Again" («Американи яна буюк қиламиз») номли сиёсий ҳаракатнинг келажаги ҳақида саволга жавоб берар экан, Трамп ҳаракатни давом эттириши мумкин бўлган кўплаб иқтидорли номзодлар мавжудлигини билдирди. У АҚШ давлат котиби Марко Рубио ва мамлакат вице-президенти Жей Ди Венс каби етакчи сиёсий шахсларни эҳтимолий ворислар сифатида номлади.

«Ҳозир шу ерда ўтирган ҳолимда, бу ҳаракатни бошқариши мумкин бўлган 10, 15 ёки ҳатто 20 киши ҳақида гапиришим мумкин», дея таъриф берди Трамп. У аниқ номларни ошкор этишдан ўзини тийиб, келажакда президентлик учун республикачиларнинг янги авлоди пайдо бўлишига ишора қилди.

Маълумот ўрнида, АҚШ конституциясининг 22-тузатишига биноан, бир шахс икки мартадан ортиқ президент бўлиб сайланиши мумкин эмас. Учинчи муддатга сайланиш учун Конституциянинг ушбу моддасига ўзгартиш киритиш керак, бу эса сиёсий жиҳатдан ўта мураккаб ҳисобланади.

Шундай қилиб, Трампнинг ушбу баёноти билан у президентликка номзодлик қўйиш ҳақидаги барча саволларга аниқлик киритди ва унинг тарафдорлари учун ҳам аниқ сигнал юборди. Бу билан сиёсатчи 2028 йилги сайловлардаги ўз эҳтимолий иштирокини чеклади ва келажакдаги сиёсий манзарани янгича шаклланишига замин яратди. «Замин»ни Telegram’да ўқинг!