Янги Рим папаси қайси исмни танлаши мумкин? Экспертлар тахминларни эълон қилди

Католик олами учун муҳим бўлган янги Рим папасини сайлаш жараёнига саноқли кунлар қолди. Бу тарихий воқеа арафасида янги сайланадиган понтифик қандай ном қабул қилиши мумкинлиги ҳақида қизғин баҳс-мунозаралар бошланди. Дарем университетининг Католик тадқиқотлар маркази католитсизм тарихи кафедраси доценти Лиам Темпл CNN телеканалига бу борада ўз тахминлари билан ўртоқлашди.

Темплнинг фикрига кўра, янги сайланадиган Рим папаси ўзининг руҳий ва ижтимоий қарашларини акс эттирувчи исмни танлаши эҳтимоли юқори. Хусусан, мутахассис келгуси понтифик учун Лео ёки Иннокентий номлари энг муносиб танлов бўлиши мумкинлигига ишонмоқда.

Унинг тушунтиришича, «Лео» исми Папа Лев XIII шахсиятига ишора қилади. Бу папа ижтимоий тенглик, инсон ҳуқуқлари, муносиб меҳнат шароитлари ва адолатли иш ҳақи учун курашган, ижтимоий ислоҳотчи сифатида тарихга кирган эди. Агар янги понтифик шундай ижтимоий дастурларга катта аҳамият қаратмоқчи бўлса, бу ном унинг қарашларига тўла мос келиши мумкин.

Иккинчи вариант сифатида кўрсатилаётган «Иннокентий» исми эса Папа Иннокентий XIII билан боғлиқ бўлиб, унинг коррупцияга қарши қаттиқ позицияси, молиявий шаффофликни таъминлаш борасидаги қатъияти билан тарихда қолган. Бу номнинг танланиши, янги папанинг коррупцияга қарши жиддий ва қатъий кураш олиб боришга тайёр эканлигини кўрсатиши мумкин.

Шунингдек, мутахассис Глобал Жануб, яъни Африка ёки Лотин Америкаси мамлакатларидан папа сайланиши ҳолатида Геласий, Милтиад ёки Виктор каби номлар ҳам танланиши эҳтимоли борлигини таъкидлади. Бу номларнинг ҳар бири Африка қитъасидан бўлган тарихий папаларга ишора қилади ва янги понтификнинг келиб чиқишини намоён қилиш учун айни муддао бўлади.

Экспертларнинг таъкидлашича, Рим папаларининг сайловдан кейин янги ном қабул қилиши тарихи жуда узун бўлиб, бу анъана X асрдан бошланган. Франция ва Германиядан келган понтификлар, айниқса, ўзларидан олдинги италиялик папаларга тақлид қилиш учун кўпроқ итальянча жаранглайдиган исмларни танлаганлари ҳам маълум қилинди.

Янги папани сайлаш учун католик дунёсининг турли мамлакатларидан 80 ёшгача бўлган қарийб 135 нафар кардинал 7 май куни Ватиканда йиғилади. Улар ушбу даврда Ватикан ҳудудидаги машҳур Авлиё Марфа уйи меҳмонхонасида истиқомат қиладилар.

Сайлов жараёни эса тарихий ва маданий аҳамиятга эга бўлган, Микеланжело ва бошқа Уйғониш даври усталари асарлари билан безатилган Сикстина капелласида ўтказилади. Бу ерда йиғилган кардиналлар ташқи дунё билан алоқани бутунлай узган ҳолда, ёпиқ эшиклар ортида янги понтифик номини белгилайдилар.

Янги папанинг сайланганлиги анъанавий тарзда мўридан чиқадиган тутун ранги орқали эълон қилинади. Агар мўридан оқ тутун чиқса, бу янги понтифик танланганини билдиради. Агар мўридан қора тутун чиқса, сайлов жараёнининг ҳали якунланмаганлигини англатади.

Ҳозирча католик дунёси янги Рим папасининг ким бўлишини ва у қайси исмни танлашини кутишда давом этмоқда. Бу муҳим воқеа нафақат диний, балки ижтимоий ва сиёсий ҳаётда ҳам катта аҳамиятга эга бўлиши аниқ. «Замин»ни Telegram’да ўқинг!