Тожикистонда саховатпеша одамлар Ҳаждан воз кечиб, Данғарага сармоя киритишди

Тожикистоннинг Данғара туманида яшовчи 80 нафар фуқаронинг Ҳаж зиёратига бориш нияти бор эди. Аммо уларнинг ярми — 40 нафар киши бу сафардан ихтиёрий равишда воз кечиб, ажратилган маблағни ўз туманини ободонлаштиришга йўналтиришга қарор қилди. Бу ҳақда Тожикистон президенти Имомали Раҳмон вилоят, шаҳар ва туман раҳбарлари иштирокидаги йиғилишда маълум қилди.

Президентнинг сўзларига кўра, Данғара аҳолиси ва тадбиркорлари томонидан туман инфратузилмасини яхшилаш ва турли ижтимоий лойиҳаларни амалга ошириш учун жами 2 миллиард 300 миллион сомоний (223 миллион доллар) йўналтирилган.

Шу маблағнинг 628 миллион сомоний қисми таълим муассасалари ва ижтимоий объектлар қурилишига сарфланган. Жумладан, Пушинг ва Корез қишлоқларида аҳоли ва маҳаллий тадбиркорлар томонидан 4800 ўринли 5 та мактаб, болалар боғчаси, соғлиқни сақлаш муассасалари ҳамда 7 та ишлаб чиқариш корхонаси барпо этилган.

Президент Раҳмон бу маблағлар аҳоли ва тадбиркорларнинг ўз ҳиссаси ҳисобидан тўпланганини таъкидлар экан, бошқа ҳудудлар раҳбарларига Данғара тажрибасини чуқур ўрганиш бўйича кўрсатма берди.

— Мамлакатимиздаги барча саховатпеша тадбиркорлар ва аҳолига ҳукумат ташаббусларини қўллаб-қувватлаётганлари учун миннатдорчилик билдираман, — деди давлат раҳбари.

Zamin.uz таҳририятидан:
Данғараликлар томонидан намоён қилинган бу ташаббус жамоат манфаати йўлида шахсий ниятлардан воз кечиш мумкинлигини кўрсатадиган ибратли мисолдир. Ҳаждан воз кечиб, келажак авлод учун мактаб ва боғча қуриш — халқпарварлик ва масъулият ҳиссининг ёрқин ифодасидир. Сиз бу қарор ҳақида нима деб ўйлайсиз? «Замин»ни Telegram’да ўқинг!