Мексико шаҳридаги машҳур Masala y Maiz ресторани ноодатий ташаббуси билан кенг жамоатчилик эътиборини тортмоқда. Ресторан эгалари меҳмонларга менюдан хоҳлаган таомини танлаш ва бунинг учун имкониятидан келиб чиқиб тўлаш имконини бермоқда.
Бу ташаббуснинг мақсади – шаҳарда турлича даромадга эга одамларни бир хил шароитда овқатланишга жалб қилиш. Махсус кунларда ресторан чек ёзмайди, балки меҳмонларга конверт берилади. Ҳар ким қанча тўлай олишини ўзи белгилайди. Айримлар кўпроқ тўлаб кетади, бошқалар эса имконига қараб камроқ қолдиради. Ҳатто пул ўрнига совға қолдирганлар ҳам бўлади.
Masala y Maiz яқинда Michelin юлдузига сазовор бўлди. Бу ютуқ ташаббусни янада кенгроқ танитишга ёрдам берди. Шу йилнинг 27-август куни Мексико шаҳридаги 20 дан ортиқ бошқа ресторан ҳам ушбу ташаббусда қатнашди.
Ресторан эгалари келгусида бу ғоя бошқа мамлакатларга ҳам ёйилишини кутмоқда. Уларнинг фикрича, бундай ташаббус нафақат иқтисодий тенгсизликни камайтиради, балки жамиятда бирдамлик кайфиятини кучайтиради.
«Замин»ни Telegram’да ўқинг!
