Хитой яна бир бор дунё миқёсидаги инженерлик мўъжизаси билан эътиборни ўзига қаратди. Гуйчжоу музофотидаги тоғли ҳудудда тарихдаги энг баланд ва энг катта осма кўприк тантанали равишда ишга туширилди. Ушбу гигант иншоот нафақат мамлакат аҳолиси, балки бутун дунё муҳандислари ва сайёҳларини ҳайратга солди.
Хуацзян дарасини кесиб ўтувчи ушбу кўприк қурилишига уч йилу тўққиз ой вақт сарфланган. Лойиҳа учун 2 миллиард юан, яъни тахминан 280 миллион доллар маблағ йўналтирилган. Янги кўприкнинг қурилиши туфайли оддий йўлда икки соат давом этган сафар энди атиги икки дақиқада амалга ошади. Бу нафақат вақт, балки транспорт харажатларини ҳам сезиларли даражада тежашга хизмат қилади.
Иншоотнинг асосий қисми 1420 метр узунликка эга бўлиб, қўшимча қисмлари билан бирга умумий узунлиги қарийб 2890 метрга етган. Кўприкнинг баландлиги эса ҳақиқий рекорд — пойдеворидан то Бэйпанцзян дарёси устидан ўтган қисмигача 625 метрни ташкил этади. Бу кўрсаткич машҳур Сан-Францискода жойлашган «Олтин дарвоза» кўпригидан деярли тўққиз баравар баланд.
Ушбу кўприк тўлиқ пўлат фермалардан қурилган ва мураккаб тоғли ҳудудда барпо этилгани боис муҳандислар учун катта синов бўлди. Шунга қарамасдан, улар замонавий технологиялар ва тажрибалардан фойдаланиб, дунёдаги энг мустаҳкам ва эстетик жиҳатдан ҳам ажойиб кўприкни яратишга муваффақ бўлишди.
Гуйчжоу музофоти кўприксозлик маркази сифатида танилган. Бу ерда олдин ҳам дунёдаги энг баланд икки кўприк қурилган. Ҳозирги пайтда музофот ҳудудида 30 мингдан ортиқ турли кўприклар мавжуд. Яъни, бу ҳудуд ҳақли равишда «кўприклар ватани» деб аталиши мумкин.
“Zamin”ни Telegram'да ўқинг!
