Жанубий Америкадаги Колумбияда яна бир ташвишли ҳодиса қайд этилди — янги қуриб битказилган кўприк очилиш маросими вақтида кутилмаганда қулаб тушди. Мазкур ҳолат Чоко департаменти таркибига кирувчи Багадо муниципалитети ҳудудида содир бўлгани маълум қилинмоқда.
Need To Know портали тарқатган маълумотларга кўра, воқеа 19 апрель куни тантанали очилиш маросими чоғида рўй берган. Пиёдалар учун мўлжалланган мазкур кўприк 85 метр узунликда бўлиб, маҳаллий аҳолига шаҳар марказидан Сан-Марино қишлоғига қулай ўтиш имкониятини яратиб бериши кўзланган эди.
Маросим давомида шаҳар раҳбарлари ва аҳоли вакиллари янги иншоотдан ўтишни бошлаган пайтда кўприк кучли чайқалишни бошлаган. Орадан кўп ўтмай, уни ушлаб турган арқонлар узилиб, бутун конструкция дарёга қулаб тушган. Кўприк устида бўлган барча одамлар сувга тушиб кетган.
Дастлабки маълумотларга кўра, ҳодиса оқибатида саккиз нафар фуқаро турли даражада жароҳат олган, улардан уч нафари шифохонага ётқизилган. Энг муҳими, ҳеч қандай ҳалокат ҳолати қайд этилмагани қайд этилмоқда.
Воқеа жойида бўлган гувоҳлар бу ҳолатни катта ҳайрат ва шок билан қабул қилганини таъкидламоқда. Маҳаллий ҳокимият раҳбари ҳам бу воқеадан сўнг муносабат билдириб, қурилиш сифатига жиддий эътибор қаратилганини айтган, бироқ ҳодисанинг бундай якун топиши кутилмаганини тан олган.
"Мен муҳандис ҳам, ишбоши ҳам эмасман, материалларни ҳам яхши тушунмайман, лекин бу қурилиш сифатли бўлишини аниқ талаб қилганман. Худога шукур, ҳамма тирик, аммо саккиз киши жароҳатланган," - деди Серна мери воқеадан сўнг.
Айни пайтда мутасадди ташкилотлар ҳодиса сабабларини атрофлича ўрганмоқда. Тергов жараёнида кўприкни қурган компания ҳам жалб этилган. Илк тахминларга кўра, иншоот бир вақтнинг ўзида кўп сонли одамлар юкламасига дош беролмаган бўлиши мумкин.
Ушбу воқеа яна бир бор қурилиш сифати ва хавфсизлик талабларига риоя қилиш қанчалик муҳим эканини кўрсатиб берди. Энди эса жамоатчилик бир саволни ўртага ташламоқда: нега янги қурилган кўприк шундай қисқа вақт ичида синовдан ўта олмади?
“Zamin”ни Telegram'да ўқинг!
