АҚШнинг собиқ президенти Доналд Трамп фақатгина бир сабаб билан Исландияни НАТО сафида қолдиришга рози бўлган. Бу ҳақда The Guardian нашри НАТОнинг собиқ бош котиби Йенс Столтенбергнинг янги китобига таяниб хабар берди.
Столтенбергнинг ёзишича, Исландия Россия сув ости кемаларини кузатиш имконияти туфайли альянсда сақлаб қолинган. Трамп эса аввал Исландиянинг НАТОдаги иштирокига шубҳа билан қараган, чунки мамлакатда қуролли кучлар мавжуд эмас ва мудофаа харажатлари ЯИМнинг 2 фоизи талабига етмаган.
Маълум қилинишича, 2017–2019 йилларда АҚШ мудофаа вазири бўлган Жим Мэттис Трампни бу қарордан қайтаришга муваффақ бўлган. У Исландиядаги НАТО базалари Россиянинг сув ости фаолиятини кузатишда муҳим рол ўйнаши ҳақида сўзлаган.
Шу сабабдан Трамп Исландиянинг альянс учун стратегик аҳамиятга эга эканига ишонган ва уни ташкилотда қолдиришга розилик билдирган.
“Zamin”ни Telegram'да ўқинг!
