Тинчлик бўйича 2025 йилги Нобел мукофоти Венесуэланинг мухолиф сиёсатчиси Мария Корина Мачадога топширилди, деб Норвегия Нобел қўмитаси маълум қилди.
Ушбу мукофот унга «Венесуэла халқи учун демократик ҳуқуқларни илгари суришдаги тинимсиз меҳнати ва диктатурадан демократияга адолатли ҳамда тинч ўтиш учун олиб борган кураши» учун берилди.
Қўмита уни Лотин Америкасидаги фуқаролик жасоратининг ёрқин намуналаридан бири сифатида эътироф этди.
Мария Мачадо сўнгги йилларда мамлакат мухолифатини бирлаштира олган, эркин сайловлар ва вакиллик ҳукуматини талаб қилишда ягона майдон яратган шахс сифатида кўрсатилди.
Бу ҳаракатлар демократиянинг тамал тошларидан бири сифатида баҳоланди.
Нобел қўмитаси унинг фаолиятини тинч кураш ва сиёсий жасорат символи сифатида қадрлади.
Эслатиб ўтамиз, АҚШ президенти Дональд Трамп ҳам бир неча бор тинчлик бўйича Нобел мукофотига ўз номзодини илгари сурган эди.
Бироқ бу йилги мукофот фуқаролик кураши ва демократик ҳаракатларга қаратилди.
Қўмита тарихан зулмга қарши курашган ва умидни йўқотмаган шахсларни тақдирлаб келмоқда.
