Қозоғистон Мусулмонлари диний бошқармаси (ҚМДБ) 2026 йилдаги асосий диний сана ва байрамлар тақвимини маълум қилди, деб хабар берди Tengrinews.kz. Маълумотга кўра, муқаддас Рамазон ойи келгуси йил 19 феврал куни бошланиши кутилмоқда.
Рамазон мусулмонлар учун энг муқаддас ойлардан бири бўлиб, рўза тутиш, ибодат қилиш ва хайр-эҳсонлар орқали руҳий покланиш даври ҳисобланади. Қамарий тақвимга кўра, ой 29 ёки 30 кун давом этади. 2026 йилда Рамазон 20 мартдаги Рамазон ҳайити билан якунланади.
ҚМДБ тақвимига биноан, Қадр кечаси 16–17 март кунларига тўғри келади, Рамазон ҳайити 20 мартда, Қурбон ҳайити эса 29 майда нишонланади.
Диний бошқарма таъкидлашича, бу саналар халқаро астрономик марказлар ҳисобларига асосланиб белгиланган. Бироқ янги ой кўринишига қараб, сана бир неча кунга ўзгариши эҳтимоли ҳам мавжуд.
Ўзбекистонда эса диний ойлар ва байрамлар санаси Мусулмонлар идораси томонидан ҳилол кузатувига қараб аниқланади. Шу сабабли, Қозоғистон эълон қилган тақвим ўзбек тақвимидан фарқ қилиши мумкин.
“Zamin”ни Telegram'да ўқинг!
