Ҳиндистонда 45 йил аввал бедарак йўқолган эркак кутилмаганда оиласи билан қайта учрашди. Бу ҳақда “Times of India” хабар берди.
Маълумотларга кўра, Рикҳи номи билан танилган эркак Ҳимачал-Прадешнинг Сирмаур туманидаги Нади қишлоғида туғилган. У 1980 йилда уйидан чиқиб кетгач, Ҳарьанада меҳмонхонада иш бошлаган, аммо ўша йили йўл-транспорт ҳалокатига учраб, бош мия жароҳати туфайли хотирасини йўқотиб қўйган.
Ота-онаси уни ҳалок бўлди деб ўйлаб, қайтиб келишига умид қилмаган. Шундан кейин Рикҳи Мумбайга кетиб, Рави Чаудҳарй номи билан янги ҳаёт бошлаган, уйланиб оила қурган ва ўтмишини бутунлай унутган.
Бир неча ой олдин яна жароҳат олгач, унинг болалик хотиралари қайта жонлана бошлаган. Хотинининг ёрдами билан у ўзининг асл келиб чиқишини аниқлаб, туғилган қишлоғини топишга муваффақ бўлган.
15 ноябрь куни эркак 1600 километр йўл босиб Нади қишлоғига қайтди ва 45 йилдан бери кўрмаган ака-укалари, опа-сингиллари билан кўришди.
Бу воқеа Ҳиндистонда катта ҳайрат ва эҳтиром билан қарши олинмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
