ХВЖ баҳоси: Киевга 2027 йилгача €137 млрд керак
Еврокомиссия раиси Урсула фон дер Ляйен Брюсселда Украинага 2026 ва 2027 йилларда ёрдам кўрсатиш ва унинг иқтисодий барқарорлигини кафолатловчи таклифлар тақдим этди. Халқаро валюта жамғармаси (ХВЖ) баҳоларига кўра, Украинага кейинги икки йилда давлат механизмининг ишлашини таъминлаш ва қаҳрамонона мудофаани давом эттириш учун 137 миллиард евро керак бўлади.
Еврокомиссия бу эҳтиёжнинг учдан икки қисмини, яъни 90 миллиард еврони қоплашни таклиф қилмоқда, қолган қисми эса халқаро ҳамкорлар томонидан тақдим этилиши лозим. Фон дер Ляйен, Европа Украинанинг энг кучли ва ишонарли ҳамкори бўлиб қолишини таъкидлади.
Икки ҳуқуқий йўл: қарз ёки репарацион кредит
Еврокомиссия аъзо давлатларга икки хил молиявий механизмни таклиф қилмоқда:
- ЕИ Қарзи (Бир овоздан): Бу таклиф ЕИ бюджети кафолати асосида капитал бозорларидан сармоя жалб қилиб, уни Украинага оддий қарз сифатида беришдан иборат. Бундай қарорни қабул қилиш учун ЕИга аъзо давлатларнинг барчаси якдиллик билан тасдиқлаши талаб этилади.
- Репарацион Кредит (Кўпчилик овоз билан): Бу вариант ЕИда музлатилган Россия Марказий банки активлари ҳисобидан репарацион кредит беришни назарда тутади. Фон дер Ляйеннинг тушунтиришича, Еврокомиссия ҳисоблардаги пул маблағларини олиб, уни Украинага кредит сифатида беради ва Украина бу кредитни фақат Россия репарацияларни тўласа, ўшанда қайтариши керак бўлади.
Белгиянинг қатъий эътирози
Иккинчи таклифга Белгия қатъий равишда қарши чиқмоқда, чунки Россиянинг тахминан 185 миллиард евро миқдоридаги блокланган активлари сақланаётган Euroclear депозитарийси айнан унинг юрисдикциясида жойлашган.
ЕИ иқтисодиёт бўйича комиссия аъзоси Валдис Домбровскис эса таклифлар юридик томондан асослантирилган, халқаро ҳуқуққа тўлиқ мувофиқ келади ҳамда суверен иммунитети тамойилига ҳурмат билан ёндашади, дея таъкидлади.
Келгуси муҳокамалар
Еврокомиссия таклифлари 18–19 декабр кунлари Европа Иттифоқи Саммитида кўриб чиқилади. Агар ушбу йўллардан бири қабул қилинса, маблағ ажратиш бўйича қонунчилик жараёни 2026 йил бошида якунланиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
