Финляндияда мол гўшти бозорида кескин қимматлашув кузатилмоқда. Мамлакатда мол тана гўштининг улгуржи нархлари тарихий энг юқори даражага чиқди ва сўнгги бир йил ичида тахминан 25 фоизга ошди. Бунга Европа бозорида гўшт нархининг кўтарилиши, маҳаллий ишлаб чиқариш ҳажмининг камайиши ҳамда тирик қорамолнинг хорижга экспорт қилиниши асосий сабаб сифатида кўрсатилмоқда.
Гўштни қайта ишлаш компаниялари Европа бўйлаб қорамол танқислиги кучайиб бораётганини таъкидламоқда. Талаб таклифдан юқори бўлиб, Африка, Туркия ва Яқин Шарқдан келаётган харидорлар Финляндия қорамоллари учун рақобатни янада оширяпти. Шу сабабли маҳаллий корхоналар қорамолни мамлакатда сақлаб қолиш учун фермерларга юқори нарх тўлашга мажбур бўляпти.
Қимматлашув истеъмолчиларга ҳам таъсир қилди. Июль–сентябрь ойлари оралиғида чакана мол гўшти нархлари тахминан 14 фоизга ошди. Ҳозирда бир килограмм қийма мол гўшти 10–15 евро атрофида сотилмоқда. Айрим харидорлар эса арзонроқ бўлган товуқ гўштига ўтишни бошлаган.
Мутахассислар огоҳлантиришича, агар мол гўшти нархи килограммига 20 еврога етса, унга бўлган талаб кескин пасайиши мумкин. Бу ҳолат эса келгусида Финляндия чорвачилик соҳасининг заифлашиши ва маҳсулотнинг асосан Европа бозорларига йўналтирилишига олиб келиши эҳтимолдан холи эмас.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
