Олимлар космосда шакли лимонни эслатувчи ғайриоддий экзосайёрани аниқлади. Илмий дунёда катта қизиқиш уйғотган ушбу объект PSR J2322–2650b деб номланиб, у James Webb космик телескопи орқали кузатилган.
Маълум бўлишича, сайёра ҳажми жиҳатидан Юпитерга яқин, аммо ташқи кўриниши мутлақо бошқача. У кучли гравитация таъсирида чўзилиб, лимонсимон шаклга келган. Мутахассислар бундай деформацияга сайёра айланиб юрган объект — пульсарнинг ўта кучли тортиш кучи сабаб бўлганини таъкидламоқда.
Энг қизиғи, PSR J2322–2650b оддий юлдуз эмас, балки нейтрон юлдуз атрофида ҳаракатланади. У пульсарга жуда яқин — тахминан 1,6 миллион километр масофада жойлашган бўлиб, бир айланишни атиги 7,8 соатда амалга оширади. Бу эса сайёрани доимий равишда кучли нурланиш таъсири остида қолдиради.
Тадқиқотлар сайёра атмосфераси ҳам ўта ноодатий эканини кўрсатди: унда углерод кўп, аммо сув, метан ва карбонат ангидрид деярли учрамайди. Олимлар бундай таркиб ҳозиргача ҳеч бир экзосайёрада кузатилмаганини таъкидламоқда.
Қисқаси, PSR J2322–2650b — нафақат шакли, балки келиб чиқиши ва таркиби билан ҳам космосдаги энг сирли объектлардан бирига айланди. Бу кашфиёт эса коинот ҳақидаги тасаввурларимизга яна бир савол белгисини қўшди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
