АҚШ штаб бошлиқлари бирлашган қўмитаси бошлиғи генерал Дэн Кэйн президент Доналд Трамп билан қўшма матбуот анжуманида Венесуэла президенти Николас Мадурони қўлга олиш операцияси қандай ўтгани ҳақида гапириб берди. Операция 2 январдан 3 январга ўтар кечаси ўтказилган, деб хабар беради Kun.uz нашри.
Амалиёт қандай тайёрланган?
Кэйннинг сўзларига кўра, ушбу амалиётга тайёргарлик кўриш тахминан бир ой муқаддам бошланган. Ундан олдин эса разведкачилар узоқ вақт давомида иш олиб боришган: разведка Мадуро қаерда ва қандай яшаши, унинг одатлари ҳақида маълумот тўплаган. The New York Times манбаларига кўра, сунъий йўлдош ва дронлар орқали олинган маълумотлар Венесуэладаги, жумладан, Мадуронинг атрофидаги манбалар йиғган маълумотлар билан тўлдирилган.
Трампнинг сўзларига кўра, америкалик ҳарбийлар ушбу маълумотлар асосида Мадуронинг қароргоҳининг нусхасини қуришган ва у ерда уни қандай қўлга олиш бўйича машғулотлар ўтказишган.
Тайёргарлик ишлари якунланганида, амалиётни кечиктириб туришга қарор қилинган, чунки Каракас осмони ўша кунларда очиқ бўлган, бундай об-ҳаво шароитида эса Америка кучларини муддатидан анча олдин пайқаб қолишлари мумкин эди. Ва фақат 3 январга ўтар кечаси осмон булут билан қопланган.
Трамп шахсан буйруқ берган
Президент Трампнинг шахсий буйруғи билан бир вақтнинг ўзида 20 та базадан ва авиаташувчилардан 150 дан ортиқ жанговар ва разведкачи самолётлар, жумладан, F-35 қирувчилари ва B-1 русумли стратегик бомбардимончилар ҳавога кўтарилган.
Кўп ўтмай амалиётга 160-махсус операциялар авиация полкининг CH-47 Chinook ва CH-53 Sea Stallion вертолётлари амалиётга қўшилган. Бу гуруҳ таркибида армиянинг Delta Force номли махсус топшириқли кучлари ҳамда адлия вазирлигининг кучишлатар бўлинмаси жангчилари Каракас томон учган. Бу амалиёт расман оғир жиноятларда айбланаётган Николас Мадуро ва унинг рафиқаси Силия Флоресни қўлга олиш амалиёти деб баҳоланган.
Вертолётлар денгиз устида 30 метр атрофидаги баландликда учишган. Улар Каракасга яқинлашганида, авиация кучлари қўлга олиш гуруҳи хавфсиз парвоз қилишини таъминлаш учун Ла-Гуайра портидаги, шунингдек, Венесуэла пойтахтини соҳилдан тўсиб турувчи Ла-Карлота ва Игерота аэропортларидаги ҳаво ҳужумидан мудофаа объектларига зарбалар йўллаган.
Мадуронинг қароргоҳидаги воқеалар
Вертолётлар ўққа тутилган. Улардан бири шикастланган ва авиаташувчи бортига қайтган. Бошқа вертолётлар эса жавоб зарбалари билан ўт очиш нуқталарини бостиришган.
Шундан кейин қўлга олиш гуруҳи Венесуэла президенти қароргоҳига бостириб кирган. Ҳудуд осмонини Америка авиацияси назорат қилган, разведкачи самолётлар ердаги вазиятни кузатиб туришган. Махсус топшириқли кучлар Мадуро ва Флоресни уларнинг ётоқхонасида қўлга олишган. Бу вақтда улар уйқуда эди.
Гуруҳ ортга қайтаётганида қўриқчилар билан отишма келиб чиққан. Самолёт ва дронлар ҳаводан зарбалар йўллаган. Бир неча дақиқадан кейин қўлга олиш гуруҳи Мадуро ва рафиқасини вертолётга олиб чиққан ва воқеа жойидан учиб кетган. Америкалик ҳарбий хизматчилар орасида йўқотишлар йўқ, фақат бир неча киши жароҳат олган.
Трамп, давлат котиби Марко Рубио, мудофаа вазири Пит Ҳегсет, президентнинг ички хавфсизлик бўйича маслаҳатчиси Стивен Миллер ва маъмуриятнинг бошқа аъзолари, шунингдек, штаб бошлиқлари бирлашган қўмитаси раиси Дэн Кэйн Трампнинг Флоридадаги қароргоҳида жиҳозланган махсус хонада Каракасда бўлаётган воқеаларни жонли эфирда кузатиб туришган.
Мадуро суд қилинади
Вертолётлар АҚШ ҳарбий денгиз кучларининг «Иводзима» десант кемаси палубасига қўнган. Кўп ўтмай Трамп Мадуронинг кишанланган, қулоқчин ва атрофни кўрсатмайдиган қора кўзойнак тақилган ҳолда тушган суратини намойиш этди. «Иводзима» Американинг Гуантанамодаги базасига қараб сузган. У ердан Мадуро ва рафиқаси Федерал қидирув бюроси самолётида Ню-Йоркка олиб келинди. Кейинги ҳафтада улар бу ерда суд қилинади.
АҚШ бош прокурори Пэм Бондининг сўзларига кўра, Николас Мадуро ва Силия Флоресга нисбатан Ню-Йорк Жанубий округида расмий айблов қўйилган. Хусусан, Мадуро наркотерроризм мақсадида тил бириктириш, АҚШга кокаин олиб кириш, шунингдек, мамлакатга қарши қўллаш мақсадида қурол ва портловчи қурилмаларни сақлашда айбланмоқда.
Трамп ғалабани эълон қилди
АҚШ президенти Truth ижтимоий тармоғида Мадуро ва унинг рафиқаси қўлга олингани ва Венесуэладан олиб чиқилганини, энди Венесуэла бўйлаб бошқа зарба берилмаслигини маълум қилган.
Кейинроқ у матбуот анжуманида операция тафсилотлари, Мадуро ва Венесуэла келажаги борасида қатор баёнотлар берди. Унинг сўзларига кўра, амалиёт чоғида бутун Каракасда электр ўчириб қўйилган.
Трамп ҳокимият хавфсиз, муносиб ва оқилона тарзда бошқа қўлга ўтгунига қадар Венесуэла АҚШ томонидан бошқарилишини таъкидлаган. Шунингдек, у АҚШ Венесуэла нефт саноати учун сармоя киритишини қайд этган.
«Биз Венесуэла халқини бой, мустақил қиламиз. Уларни бахтли қиламиз. Венесуэла барча имкониятларга қарамасдан, деярли нефт қазиб олмаган. АҚШдаги йирик компаниялар у ерга боради ва нефт инфратузилмасини тиклаш учун миллиардлаб доллар сарфлайди», – дейди АҚШ етакчиси.
“Zamin”ни Telegram'да ўқинг!
