3 январь куни Венесуэла пойтахти Каракасда ва бошқа ҳудудларда портлашлар содир бўлди. АҚШ президенти Доналд Трампнинг фармонига кўра, Венесуэлада ҳарбий амалиёт бошланди. Трамп ўз ижтимоий тармоқ саҳифасида Венесуэла объектларига зарба берилганини ва президент Николас Мадуро ҳамда унинг рафиқаси қўлга олинганини тасдиқлади. АҚШ давлат котиби ўринбосари Кристофер Ландау Венесуэлада Мадуро ҳокимияти тугатилгани ва унинг жиноятлари учун судга берилиши ҳақида баёнот берди.
Венесуэла ташқи ишлар вазирлиги эса АҚШни халқаро ҳуқуқни бузганликда айблади ва БМТ Хавфсизлик кенгашидан чора кўришни сўради. АҚШ, Венесуэла орқали наркотрафикнинг хавфли бўлгани ва унинг АҚШ хавфсизлигига таъсирини таъкидлаб, Мадуронинг коррупция ва наркотрафикка алоқадорлигини айбламоқда.
Ўзбекистонлик таҳлилчи ва ижтимоий тармоқ фаоллари Доналд Трампнинг Венесуэлада амалга оширган ҳаракати халқаро ҳуқуққа зид эканига эътибор қаратмоқда.
Фарҳод Каримов шундай деб ёзди: «Куппа-кундуз бир давлатнинг раҳбарини ўғирлаб кетишди. Бу ҳеч қайси мантиққа тўғри келмайди. Унинг мотивини тушундик, лекин бундай усул билан хоҳлаган иш қилиш оқибатини англашмаганини тушунмадим. Ҳамма хоҳлаган ишини қилиши мумкин энди. Оқибати АҚШнинг ўзига қарши ишлайди. Трамп назоратни йўқотди».
Отабек Акромов эса: «Катта давлатлар бирин-кетин ўз қудратини намойиш қилмоқда. Энди навбат Хитойнинг Тайванга ҳужумигами?» деб савол қўйди.
Мухтор Назиров: «Амалдаги стратегия Венесуэлада сиёсий ҳокимиятни алмаштиришга қаратилган бўлиши мумкин» деб қайд этди.
Муҳрим Аъзамхўжаев: «Афсуски, мана шунақа зўравонлар замонида яшаяпмиз. Ақл, фикр кучи эмас, билак кучи ҳал қиляпти ҳаммасини. Венесуэладан кейинги нишон Эрон бўлса керак. Роса қайнаб турибди ҳозир.»
Ботир Қобилов: «Венесуэла қирғоқларида қайиқда кетаётганларни ҳеч қандай далил-суд-ҳукмларсиз булар наркотеррористлар эди деб бомбардимон қилиш билан тўхтаб қолишмасди-ку. Тинчлик бўйича Нобелни менга беринглар эмиш яна.»
Муҳаммадқодир Собиров эса: «Трамп яна бир ойча кутиб, 24 февралда Венесуэлага бостириб кирганда, ўзини оқлашга яхшигина рамз яратарди.»
Телеграмдаги «Strategic Focus: Atlantic» канали: «Шундай қилиб, дунё нефтининг 16 фоизи АҚШ назоратига ўтди,» деб хулоса қилди.
Венесуэла президенти Николас Мадуро 2013 йилдан буён мамлакатни бошқараётган бўлиб, 2024 йил июл ойида президентлик сайловида ғалаба қозонганини эълон қилгач, халқаро ҳамжамият норозилигига учраган эди. АҚШ Мадурони қўлга олганлик учун 50 миллион доллар мукофот пули эълон қилган.
Шунингдек, Трампнинг Венесуэладаги ҳарбий ҳаракатлари дунёдаги глобал сиёсатни янада мураккаблаштириши ва янгидан-янги геосиёсий низоларни келтириб чиқариши мумкин.
“Zamin”ни Telegram'да ўқинг!
