Туркиянинг йирик қурилиш компанияларидан бири Истанбул халқаро аэропортидаги қурилиш майдонларида ишлаш учун Ўзбекистон фуқароларидан иборат гуруҳни ишга қабул қилади. Иш берувчи ходимларни транспорт билан таъминлайди, яшаш жойи ва кунига уч маҳал овқатни йўлга қўяди, шунингдек махсус кийим ҳамда шахсий ҳимоя воситаларини беради. Бундан ташқари, Туркияда расмий ишлаш рухсатномасини расмийлаштириб беради. Бу ҳақда podrobno.uz хабар беради.
“Дунё” маълумотига кўра, ташаббус Ўзбекистоннинг Истанбулдаги Бош консулхонаси ҳамда ADS Hukuk консалтинг компанияси ўртасидаги музокаралар натижасида юзага келган. Келишув Туркиянинг етакчи компанияларидан бири — Kalyon Insaat Sanayi Ve Ticaret A.Sh. билан эришилган. Компания кўп йиллардан бери қурилиш, энергетика ва транспорт йўналишларида йирик лойиҳаларни амалга ошириб келади.
Келгусида дастур кўламини кенгайтириш ва қурилиш жараёнига қўшимча ходимларни саралаб олиш режалаштирилган.
Шу билан бирга, Ўзбекистонда чет элда ишлаш учун кадрлар тайёрлаш бўйича лойиҳалар ҳам йўлга қўйилмоқда. Жумладан, Тошкентда Абу Али ибн Сино номидаги техникум базасида Германия тиббиёт академияси очилди. Жорий ўқув йилида бу ерда Германия клиникаларида ишлаш имконига эга бўладиган 750 нафар ҳамшира ва ўрта бўғин тиббиёт ходимлари тайёрланади.
“Zamin”ни Telegram'да ўқинг!
