Володимир Зеленский маълум қилишича, АҚШ маъмурияти урушни ёз бошигача — яъни июнь ойигача — тугатишни мақсад қилган ва шу йўналишда “аниқ қадамлар жадвали”га ўхшаш музокаралар режасини таклиф этмоқда.
Президентнинг айтишича, Вашингтон янги “энергетик сулҳ” ташаббусини — энергетик объектларга зарба бермаслик ғоясини — илгари сурган. Киев бу таклифга розилик билдирган, бироқ Россия томони ҳозирча жавобни кейинроқ беришини билдиргани айтилмоқда.
Майамида учрашув ғояси биринчи бор янгради
Энг диққатга сазовор нуқта — Майамида навбатдаги раунд ўтиши мумкинлиги. Зеленскийга кўра, АҚШ илк бор Украина ва Россия музокара гуруҳларининг Америка ҳудудида учрашувини таклиф этган ва бу учрашув тахминан бир ҳафтадан сўнг бўлиши мумкин. Украина иштироки аллақачон тасдиқланган.
Бу орада Кремль матбуот котиби Дмитрий Песков янги раунд “яқин орада” бўлишини айтган, аммо унинг баёнотида учрашув АҚШда ўтиши ҳақида гап бўлмагани ҳам қайд этилган.
Энг оғир нуқталар ҳали ҳам стол устида
Зеленский музокараларда ҳал бўлмай келаётган энг қийин масалаларга ҳам тўхталди. Унга кўра, айрим “тугун”лар Украина–АҚШ–Россия иштирокидаги эҳтимолий уч томонлама лидерлар учрашуви форматида муҳокама қилиниши мумкин.
Территория бўйича баҳс эса ўша-ўша: Донецк вилояти юзасидан Россия бутун ҳудуд устидан назоратни талаб қилаётган пайтда, Украина “қайси жойда турибмиз — ўша ерда қоламиз” тамойилини ўт очишни тўхтатиш учун энг ишончли вариант деб ҳисоблашини қайта тасдиқлаган.
Шу билан бирга, АҚШ Донбассда эркин иқтисодий зона ташкил этишни муроса варианти сифатида таклиф қилгани айтилмоқда. Аммо бу ғояни нa Украина, нa Россия томони жиддий қўллаб-қувватламаяпти — ҳар кимда ўз “қизил чизиғи” бор ва у чизиқ ҳали ўчмаган.
Яна бир очиқ қолган йирик савол — Запорожье атом электр станциясининг келажаги. Бу йўналишда ҳам ҳозирча умумий ечим йўқлиги билдирилган.
Трампнинг сигнали қаттиқ, календар ҳам аниқ
Бу фон ортида Доналд Трамп ҳам “ёзгача натижа керак” деган ишорани очиқ беряпти: Зеленскийнинг сўзларига кўра, АҚШ томони июнь ойигача келишувга келиш учун босим механизмларини ҳам ишга солиши мумкин.
Хулоса шу: режа бор, майдон (Майами) ҳам айтилаяпти, “энергетик сулҳ”га принципиал розилик ҳам билдирилган. Энди энг муҳим савол битта — Россия томони жавобни қачон ва қандай беради. Чунки дипломатияда “кейинроқ айтамиз” деган ибора баъзан пауза, баъзан эса тактик тўсиқ бўлиб чиқади.
“Zamin”ни Telegram'да ўқинг!
