Жеффри Эпштейн иши бўйича яқинда ошкор қилинган ҳужжатларда Маккадаги Каъбадан муқаддас мато — Кисва бўлаклари AQShга жўнатилгани ҳақида маълумотлар учради. Хабарда айтилишича, жўнатмалар Бирлашган Араб Амирликлари билан боғлиқ алоқалар орқали ташкил этилган ва Эпштейнга етказиб берилган.
Ҳужжатларда қайд этилишича, 2017 йил февраль–март ойларида Азиза ал-Аҳмадий исмли тадбиркор аёл Абдуллоҳ ал-Маари билан ҳамкорликда Каъбани қоплайдиган қора, олтин каштали Кисванинг учта бўлагини жўнатган.
Кисва ислом оламида ниҳоятда муқаддас саналади: ҳар йили Каъбадан эски мато олиниб, ўрнига янгиси ўрнатилади. Олдинги Кисва қисмлари эса диний ва тарихий аҳамиятга эга нодир артефакт сифатида қаралади.
Эпштейн файлларига кўра, юк Саудия Арабистонидан Флоридага British Airways орқали ҳаво юклари йўли билан юборилган. Жўнатма 2017 йил март ойида Эпштейннинг Флоридадаги уйига етказилгани айтилмоқда. Шу пайтга келиб у аллақачон жинсий жиноятчи сифатида судланган ва рўйхатга олинган эди.
Электрон хатлардан бирида Аҳмадий Эпштейнга мурожаат қилиб, матонинг диний аҳамиятини алоҳида таъкидлагани қайд этилган. Бироқ ёзишмаларда бу буюмлар нега айнан унга йўллангани ва томонлар ўртасидаги танишув қандай бошлангани очиқланмаган.
“Zamin”ни Telegram'да ўқинг!
