Нью-Йоркда тарихий черковда кучли ёнғин чиқди
Нью-Йоркнинг Астория ҳудудида 1850 йилларда қурилган тарихий черковда кучли ёнғин юз берди. Ҳодисани бартараф этишга 250 дан ортиқ қутқарувчи жалб этилиб, улардан олти нафари турли даражада жароҳат олди. Аланга оқибатида бино томининг бир қисми қулаб тушган ва яқин атрофдаги аҳоли хавфсизлик мақсадида эвакуация қилинган. Ҳозирда мутахассислар фойдаланилмай келинаётган ушбу иншоотда келиб чиққан ёнғин сабабларини ўрганмоқда.
Кеча, 23 апрель куни кечқурун АҚШнинг Нью-Йорк шаҳри Астория (Куинс) ҳудудида жойлашган бўш турган тарихий черковда йирик ёнғин содир бўлди. Ҳодиса жойига 250 дан ортиқ ўт ўчирувчи ва тез тиббий ёрдам ходимлари жалб этилган бўлиб, 6 нафар қутқарувчи жароҳат олган.
Маълумотларга кўра, черков 12-кўча, Астория булъвари ва 27-авеню оралиғида жойлашган. Ёнғин кеч соат 18:45 атрофида черков ҳовлисидаги ёрдамчи бинодан бошланган ва қисқа вақт ичида асосий иншоотга тарқалган. Кейинчалик аланга кучайиб, бешинчи даражагача етган.
Қалин қора тутун бутун ҳудудни қоплаб олгани сабабли маҳаллий аҳолига эҳтиёткорлик чораси сифатида ниқоб тақиш тавсия этилган. Кучли аланга черков томидан кўтарилиб чиққан ҳолатда кузатилган.
Ўт ўчириш хизмати вакили Кевин Вудснинг маълум қилишича, қутқарувчилар бино ичига кириб, бир нечта сув шланглари ёрдамида ёнғинни ўчиришга уринишган. Бироқ эски иншоотларда ёнғин деворлар ва том қисмларига тез тарқалиши сабабли уни назоратга олиш қийин бўлган.
Ҳодиса давомида черков томининг бир қисми қулаган ва тушиб кетган ғиштлардан бири ўт ўчирувчига тегиб, у шифохонага ётқизилган. Шу билан бирга, хавфсизлик чораси сифатида яқин атрофдаги бинолардан одамлар эвакуация қилинган.
Маҳаллий тарихчи Доминик Перронинг айтишича, ёнган иншоот XIX аср ўрталарида, тахминан 1850 йилларда қурилган бўлиб, “Dutch Reformed Church” сифатида фаолият юритган. Сўнгги бир йил давомида у фойдаланилмай турган ҳолда қолдирилган.
Ҳозирча ёнғиннинг аниқ сабаби маълум эмас, тегишли хизматлар тергов ишларини олиб бормоқда.
Изоҳлар 0
…