АҚШ президенти Donald Trump сўнгги ойларда жиддий сиёсий босимга дуч келмоқда. Янги ижтимоий сўровлар натижаларига кўра, унинг оммавий қўллаб-қувватлаш даражаси кескин пасайиб, тарихий энг паст кўрсаткичлардан бирига тушган.
Таҳлилларга қараганда, ҳозирда америкаликларнинг атиги 35 фоизи Donald Trump сиёсатини қўллаб-қувватламоқда. Бу эса Оқ уй учун хавотирли сигнал сифатида баҳоланмоқда.
Мутахассислар фикрича, рейтингнинг тушишига бир вақтнинг ўзида бир нечта омил таъсир қилмоқда. Аввало, мамлакатда нарх-наво ўсиши, иқтисодий ноаниқлик ва аҳоли харажатларининг ортиши одамлар кайфиятига салбий таъсир кўрсатган.
Шунингдек, президентнинг қатъий бож сиёсати ва ташқи ҳарбий ҳаракатлар бўйича қарорлари ҳам жамоатчилик орасида турли баҳс ва танқидларга сабаб бўлмоқда.
Сўров натижаларига кўра, аҳолининг фақат 38 фоизи Donald Trump сайловолди ваъдаларини бажараётганига ишонади. Қолган қисми эса президентнинг иқтисодий ва ижтимоий сиёсатидан кўнгли тўлмаётганини билдирган.
Айниқса, америкаликларнинг учдан икки қисмидан кўпроғи мамлакатда нархларни тушириш бўйича амалий чоралар етарли эмас деб ҳисобламоқда. Бу эса инфляция ва кундалик ҳаёт билан боғлиқ муаммолар одамлар учун асосий мавзулардан бири бўлиб қолаётганини кўрсатади.
Яна бир эътиборли жиҳат — сўровда қатнашган фуқароларнинг 61 фоизи президент қарорларини олдиндан тахмин қилиш қийинлигини айтган. Таҳлилчилар буни Оқ уй сиёсатидаги кескин ва баъзан кутилмаган қарорлар билан изоҳламоқда.
Сиёсий экспертлар фикрича, бу ҳолат ноябрь ойида бўлиб ўтадиган Конгресс сайловларида республикачилар учун жиддий хавф туғдириши мумкин. Чунки паст рейтинг одатда партиянинг умумий позицияларига ҳам таъсир кўрсатади.
Айрим манбалар ҳатто Оқ уйда эҳтимолий мағлубият сценарийлари муҳокама қилинаётганини ёзмоқда. Агар демократлар парламент назоратини қўлга киритса, турли текширувлар ва ҳатто импичмент жараёнлари ҳақидаги муҳокамалар яна кун тартибига чиқиши мумкин.
Ҳозирча Donald Trump маъмурияти бу каби тахминларга расмий муносабат билдирмаган. Бироқ Америка сиёсий саҳнасидаги кескинлик ва рақобат кейинги ойларда янада кучайиши кутилмоқда.
“Zamin”ни Telegram'да ўқинг!
