Бугун, 13 май куни Туркия Президенти Ражаб Тойиб Эрдўған рафиқаси Эмина Эрдўған билан биргаликда расмий ташриф билан Қозоғистонга етиб келди. Бу ҳақда ТРТ маълум қилди.
Мазкур ташриф доирасида юқори даражадаги дипломатик музокаралар режалаштирилган бўлиб, унда икки давлат ўртасидаги ҳамкорликни янги босқичга олиб чиқиш масалалари муҳокама қилинади. Дастлаб, Эрдўған Қозоғистон пойтахти Остонада икки томонлама учрашувларда иштирок этади. Шундан сўнг у Туркистон шаҳрида ўтказиладиган Туркий давлатлар ташкилоти етакчиларининг норасмий саммитида қатнашади.
Расмий учрашувлар доирасида Эрдўған Қосим-Жомарт Тўқаев билан Мустақиллик саройида яккама-якка музокаралар олиб боради. Ушбу учрашув икки томонлама муносабатларни мустаҳкамлаш, сиёсий ва иқтисодий алоқаларни янада ривожлантириш учун муҳим аҳамият касб этади.
Шунингдек, давлат раҳбарлари Туркия–Қозоғистон Олий даражадаги стратегик ҳамкорлик кенгаши йиғилишига биргаликда раислик қилади. Ушбу йиғилишда икки давлат ўртасидаги кенг қамровли шерикликни янада чуқурлаштириш, ўзаро ишонч ва ҳамкорликни мустаҳкамлаш масалалари муҳокама марказида бўлиши кутилмоқда.
Ташрифнинг иқтисодий йўналишида эса савдо-иқтисодий алоқаларни кенгайтириш асосий эътибор марказида туради. Хусусан, томонлар ўзаро савдо ҳажмини 15 миллиард долларга етказиш бўйича режаларни муҳокама қилади. Бундан ташқари, энергетика соҳасидаги қўшма лойиҳалар, сармоявий ташаббуслар ва инфратузилмавий ҳамкорлик масалалари ҳам кун тартибидан жой олган.
Сафар доирасида Туркия ва Қозоғистон етакчилари бизнес форумда ҳам иштирок этиб, икки мамлакат тадбиркорлари билан учрашади. Ушбу мулоқотлар орқали янги инвестиция имкониятлари очилиши, қўшма лойиҳалар сони ортиши ва иқтисодий алоқалар янада жонланиши кутилмоқда.
Умуман олганда, мазкур ташриф Туркия ва Қозоғистон ўртасидаги стратегик шерикликни мустаҳкамлаш, сиёсий мулоқотни фаоллаштириш ҳамда иқтисодий ҳамкорликни янги босқичга олиб чиқишда муҳим қадамлардан бири сифатида баҳоланмоқда.
“Zamin”ни Telegram'да ўқинг!
