Америкалик эркак қизи билан аравачада жаҳон рекордини янгилади

АҚШлик шифокор ва собиқ енгил атлетикачи Стивен Бибелхаузен қизчаси Блейкни махсус югуриш аравачасига ўтқазиб, бир миллик масофани 4 дақиқа 17 сонияда босиб ўтди.

Ушбу натижа 8 август куни Кливленд шаҳрида ўтказилган Guardian Mile мусобақасининг Stroller Mile баҳсида қайд этилди. У мусобақада қизини Hope Memorial Bridge орқали етаклаб югурган.

Бибелхаузеннинг натижаси ҳозирча расмий жаҳон рекорди сифатида тасдиқланмаган. Бироқ у 2025 йилда Силас Франц қайд этган 4 дақиқа 26,29 сониялик натижадан қарийб 9 сония яхшироқ.

Стивеннинг сўзларига кўра, у қизчасини аравада олиб югуришни ёз давомида машқ қилган. Мусобақада эса Блейк отасини қўллаб-қувватлаган ва томошабинларнинг олқишларидан хурсанд бўлган.

Энг муҳими, Бибелхаузен учун бу шунчаки тезлик синови эмас. У мусобақани қизчаси билан бирга ўтказилган қимматли вақт сифатида баҳолаган.

Агар Гиннес рекордлар китоби натижани расман тасдиқласа, Стивен Бибелхаузен аравачада фарзандини етаклаган ҳолда бир милни энг тез босиб ўтган инсонга айланади.