Пенсия олиш учун ўлган онасининг жасадини 2,5 йил сақлаб ўтирди

Нидерландиянинг Харлен шаҳрида ўлган онасининг пенсиясини олиш учун унинг жасадини 2,5 йил сақлаб ўтирган 66 ёшли одам кассация суди қарорига кўра 10 ойга қамалди.

ВВС хабарида айтилишича, унинг 91 ёшли онаси 2013 йилнинг июлида оламдан ўтган. Бироқ ойлик даромади камайишидан қўрққан ўғил бу ҳақда ҳеч кимга оғиз очмаган. Онасининг жасадини фольга билан ҳаво ўтказмайдиган қилиб ўраб, тобутга солиб қўйган. Тобутни эса онасининг хонасида сақлаган. Хонага ҳаво кириши учун кечқурунлари деразаларни очиб қўйган, бундан ташқари, тинимсиз ёқимли исли спрейлардан фойдаланган.

Тобут 2,5 йилдан кейин қўшниларнинг саъй-ҳаракати билан топилди. Бу вақт давомида нидерландиялик одам онасининг номига 72 800 евро пенсия олган. Ўзининг айтишича, ижтимоий ёрдамга муҳтож бўлиб қолмаслик учун ана шундай йўл тутган ва бунинг учун ўлмасидан олдин онасининг розилигини олган.

Суд пенсия пулларининг қайтарилишига қарор қилди. «Замин»ни Telegram’да ўқинг!