Невропатолог олим Зарифбой Ибодуллаев: “Тез асабийлашадиган кишиларга рўза тутишни тавсия қиламан”

^{Фото: “Дарё" / Зарифбой Ибодуллаев}
Невропатолог олим, профессор Зарифбой Ибодуллаев неврологик касалликларни қай ҳолатларда рўза тутиш мумкин ёки қай ҳолатларда тавсия этилмаслиги юзасидан “Дарё” нашрига изоҳ берди.

Олимнинг айтишича, эпилепсия касаллигида ҳар 4 соатда ёки 12 соатда истеъмол қилинадиган дорилар бор. Бундай ҳолатларда саҳарликда битта, ифторликда битта дори ичиб, рўза тутса бўлади.

"Инсульт билан инфарктни оладиган бўлсак, инсультнинг шунақа турлари борки, унинг ўткир даврида табиийки рўза тутилмайди. Инсульт бўлганига 3-6 ой бўлган ёки 1 йил бўлганлар дориларни икки қисмга — эрталаб ва кечқурунга ажратиб олиши мумкин.

Кўпинча тўйиб еганда ёки ёғли овқат истеъмол қилганда қон босими ошади. Қон босимининг жуда кўп турларида — аритмия каби юрак касалликларида намоён бўлмайдиган оддий қон босимларда рўза тутиш фойдали", — дейди невропатолог.

Зарифбой Ибодуллаевнинг алоҳида таъкидлашича, невроз ва депрессияси бор кишиларга рўза тутиши жуда фойдали.

"Депрессия ва неврозда инсоннинг кайфияти бузиладиган, яъни нотурғун бўладиган ҳолат. Психотерапия иштиёқни, иродани ва ҳар қандай вазиятда ҳам сабрни кучайтиришга қаратилади. Рўза тутиш айнан сабрни, тартибни шакллантиради, мия тартибни жуда яхши кўради", — дейди олим. “Замин” янгиликларини “Telegram”да кузатиб боринг