Қишда терини қандай парвариш қилиш керак?

^{© Sputnik / Ilya Naymushin}
Қишда теримиз айниқса ҳимоясиз бўлади — унинг ҳолати қуруқ ҳаво, паст ҳарорат ва ифлосланиш сабабли ёмонлашади. Sputnik Ўзбекистон тошкентлик шифокор-косметолог-онколог Сибел Ризаевага қиш даврида терини тўғри парвариш қилиш борасида саволлар билан юзланди.

- Совуқ мавсумда ва ҳавонинг ифлосланиш даражаси ошиши билан юзага келадиган асосий тери муаммолари қайсилар?
- Биринчи нарса қуруқлик. Шу сабабли тери таъсирчанлиги ошиши мумкин. Бундан ташқари, ҳаво ифлосланиш даражаси ҳам терининг моддалар алмашинувининг етишмаслигига олиб келиши мумкин: у токсинларни тўплай бошлайди, чунки улардан халос бўлишга улгурмайди. Шу сабабдан, қуриш, таъсирчанлик ва тез қариш кузатилади. Тургор (таранглик, эластиклик) ва терининг тонуси ёмонлашади.

- Тери ташқи муҳит таъсиридан жабрланаётганини қандай аниқлаш мумкин?
- Буни ташқи кўринишидан ва ҳис қилиш орқали аниқлаш мумкин. Тери нозик бўлиб қолади, нотекис доғлар, қизаришлар, маҳаллий ёки умумий қуруқлик, қичишиш ва ачишиш пайдо бўлади.

- Қишда терини кундалик парвариш қилиш учун қандай асосий тавсиялар берасиз?
- Асосий қоида: қуруқ терини намлаш, таъсирчан терини тинчлантириш. Менга эмолент кремлар жуда ёқади. Бу воситалар ҳамма учун мос, аммо акнега мойил тери учун парвариш шифокор томонидан индивидуал равишда танланиши керак.

- Қишда терини ҳимоя қилиш учун парвариш косметикасида қайси ингредиентлар энг самарали?
- Юқорида айтилганидек, бу эмолентлар. Улар таркибида терини даволайдиган, тиклайдиган ва юмшатадиган, шунингдек, намликни зарур миқдорда сақлайдиган ёғ компонентлари мавжуд.

- Совуқ мавсум бошланиши билан одатий косметик воситаларни ўзгартириш керакми?
- Фақат муаммо юзага келса. Муаммо пайдо бўлишига қараб янги парвариш воситаларини танлаш керак.

- Терини ҳимоя қилиш ва унинг соғлом кўринишини сақлашга нима ёрдам беради?
- Аввало, соғлом турмуш тарзи: спорт, мувозанатли овқатланиш, тўлиқ уйқу ва кун тартибига риоя қилиш. Баъзида косметолог хизматларидан фойдаланиш мумкин.

- Терини ифлосланишдан тозалаш учун уйда қандай муолажалар қилиш мумкин?
- Бир марта кечки ювиниш етарли. Агар тери жуда ифлос бўлса, бу амалиётни икки босқичга бўлиш мумкин: бальзам ёки гидрофил ёғ билан тозалаш, кейин гель ёки кўпик билан ювиш. Шунингдек, ҳафтада 1-3 марта энзим пудрадан фойдаланинг. Эрталаб гель ёки кўпик билан енгил тозалаш етарли. Терининг ҳимоя тўсиғини бузмаслик учун ҳаддан ташқари ошириб юбормаслик муҳим.

- Ҳавонинг ифлосланиши таъсиридан кейин терини тиклашга ёрдам берадиган салон муолажалари борми?
- Ҳа, албатта. Мен фаолиятимда кўпинча мезо-коктейллар каби инъекция амалиётларидан фойдаланаман. Бу терининг ҳолатини яхшилайдиган ва ёшга боғлиқ ўзгаришларни бартараф этадиган препаратлар. Натижалар биринчи амалиётдан сезилади. «Замин» янгиликларини «Вконтакти»да кузатиб боринг