ChatGPT орқали орзуларингизга эришиш мумкин: буни тиктокер ўз ҳаётида қўллади

Ҳозирги ноаниқ ва мураккаб даврда инсонлар ўз орзуларини аниқ тасаввур қилишга ва уларга эришиш йўлини топишга ҳаракат қилишмоқда. Шундай вазиятларда сунъий интеллект (АI) ёрдамига мурожаат қилаётган одамлар сони кун сайин кўпайиб бормоқда. Бу борада эса ChatGPT чатботи алоҳида аҳамият касб этмоқда.

Тасаввур қилинг: сиз эрталаб уйғонасиз ва шахсий боғингизда сайр қиласиз, шундан кейин ўз теннис кортингизда ўйнайсиз. Кейин эса шахсий офисингизга йўл оласиз ва жамоангиз билан учрашиб, навбатдаги лойиҳаларингизни муҳокама қиласиз. Бизнесингиз яхши кетмоқда ва молиявий хавфсизлигингиз кафолатланган. Тушликни шаҳар ташқарисида ўтказиб, кечки пайт яқин дўстларингиз ва оила аъзоларингиз билан учрашасиз. Ҳамма нарса ажойиб, ҳаётингиз мукаммал даражада чиройли ва тинч... Бу тасвир сизга ҳақиқатдан ҳам фантастика каби кўриняптими? Ҳа, ростдан ҳам, бу инсон хаёли эмас, бу тасвирни ChatGPT ёрдамида тиктокер Гермейн Миллер яратган.

Гермейн Миллер сунъий интеллектга ўзининг келажакдаги ҳаёти ҳақида иложи борича кўпроқ орзу ва мақсадларини айтиб берди. Шундан сўнг ChatGPT унга шу қадар аниқ, ҳаётий ва ёқимли бир кунлик сценарийни ёзиб бердики, блогер буни ўқиб, кўз ёшларини тутиб тура олмади:

"Мен соғлом, бой ва бахтли бўлишни истайман. Бунинг учун ўзим истаган ҳаётимни ChatGPT’га тасвирлаб бердим. Бу сўзлар шу даражада аниқ ва ҳиссий чиқдики, ҳатто кўз ёшларимни ҳам тўхтата олмадим," — дейди Миллер ўз тажрибасини баён қилиб.

Аслида, бу ҳолатда Гермейн ёлғиз эмас. Сўнгги пайтларда ChatGPT орқали орзу ҳаётини тасвирлаш тренди бутун дунё бўйлаб кенг тарқалмоқда. TikTok ижтимоий тармоғида #ChatGPTDreamLife хештеги билан боғлиқ бўлган видеоларнинг сони 9 миллиондан ошиб кетди. Одамлар ўзлари орзу қилган ҳаётдаги бир кунни AI орқали ёзиб беришни сўраб, бундан руҳланишмоқда ва ўзларини янада яхши ҳис қилишмоқда.

AI орқали яратилган сценарийлар турлича: кимдир океан соҳилида ўтириб, ишлайдиган идеал ҳаёт ҳақида тасвирлар яратса, бошқа биров дунё бўйлаб чекловсиз саёҳат қилиб юргани ёки соғлиғи мукаммал ҳолатга келгани ҳақида тасвирларни буюртма қилмоқда.

Бундай сценарийларни яратиш учун формула жуда оддий. Сиз ChatGPT чатботига ўзингизнинг барча орзу, мақсад ва хоҳишларингизни баён этасиз, у эса сиз учун шу мақсадлар асосида "идеал ҳаётингизнинг" бир кунини ёзиб беради. Бу эса инсонларда хаёл, мотивация ва руҳий тетиклик уйғотиб, мақсадларга етишиш учун кучли илҳом манбасига айланмоқда.

Бироқ, бу тренд ортида саволлар ҳам йўқ эмас. Ҳаётингизни аниқ ва мукаммал даражада тасвирлашга қодир бўлган сунъий интеллект орқали яратилган "орзулар" инсонларни ҳақиқий ҳаётга яқинлаштирадими ёки, аксинча, уларни реалликдан узоқлаштирадими? ChatGPT орқали ўзингизнинг идеал ҳаётингизни тасвирлаш билан орзуларингизга яқинлашишингиз мумкин, лекин бу билан аслида нимани ютқазиб қўйишингиз ҳам мумкин эканини унутмаслик зарур.

Шундай қилиб, орзуларингизни AI орқали ҳаётингизга киритиш осон бўлса-да, унга эришиш учун инсоннинг ўз ҳаракати, фидойилиги ва мотивацияси ҳам талаб қилинади. Шундай экан, сиз учун муҳим бўлган нарсани сўраб кўришга журъат қиласизми? Мабодо, ChatGPT орзуларингизни амалга ошириш учун биринчи қадам бўлиб қолсачи?