Сўнгги пайтларда уйқу мавзуси яна кун тартибига чиқди: испаниялик терапевт Висенте Мера сурункали тарзда кам ухлаш организмга оғир босим бериши, вақт ўтиб соғлиққа “секин бомба” бўлиб ишлаши мумкинлигини таъкидлади. Уйқу — шунчаки дам олиш эмас, бу тананинг тикланиш режими. Қисқаси, “кейин ухлаб оламан” деган режани организм ҳар доим қабул қилавермайди.
Уйқуга тайёргарликни эртароқ бошлаш керак
Мутахассиснинг тавсияси оддий: ухлашдан камида 1 соат олдин ўзингизни “тинч режим”га ўтказинг. Бу вақтда энг асосий қадам — экранлардан узоқлашиш. Смартфон, телевизор, планшетдан чиқадиган ёруғлик мелатонин (уйқу гормони) ишлаб чиқилишига салбий таъсир қилиши мумкин, шунинг учун мия “ҳали кундуз-ку” деб қолади.
Қисқа қилиб айтсак: кечаси телефонга тикилиш — мияга “уйқуни cancel қилдик” деган сигнал.
Илиқ душ ёки юзни илиқ сув билан ювиш нима беради?
Мера фикрича, иссиқ душ қабул қилиш ёки юзни илиқ сув билан ювиш танани уйқу вақти келганига “ишора” қилади. Ҳиссиёт жиҳатдан ҳам тана бўшашади, асаблар тинчийди, уйқу тезроқ келиши осонлашади. (Бу мўъжиза эмас, лекин яхши “лайфхак”.)
Энг кучли одат — барқарор режим
Мутахассис алоҳида урғу берган нуқта: ҳар куни бир вақтда ухлаш ва уйғониш. Ҳатто дам олиш куни ҳам. Чунки мунтазамлик биологик соатни “синхрон” ҳолатда ушлаб туради. Уйқу бўйича тавсияларда ҳам доимий графикни сақлаш муҳимлиги қайд этилади.
Кечки “уйқу режими”ни тез йўлга қўйиш учун 5 қадам
1. Ухлашга 1 соат қолганда телефонни четга қўйинг..
2. Хонани салқинроқ ва қоронғироқ қилинг.
3. Илиқ душ ёки юзни илиқ сув билан ювиб олинг.
4. Қаҳва, кучли чой, энергетикни кечқурунга қолдирманг.
5. Бир вақтда ухлаб, бир вақтда туришни одат қилинг.
“Zamin”ни Telegram'да ўқинг!
