Бугунги кунда AirPods ва турли қулоқчинлардан фойдаланиш кўпчилик учун одатий ҳолга айланган. Мусиқа тинглаш, видео кўриш, дарс ёки иш жараёнида қўнғироқларга жавоб бериш қулай бўлса-да, улардан узоқ вақт ва баланд овозда фойдаланиш эшитиш саломатлигига зарар етказиши мумкин.
Мутахассисларнинг таъкидлашича, қулоқчин орқали жуда баланд овозда мусиқа тинглаш эшитиш нервларига босим беради. Айниқса, ҳар куни бир неча соат давомида юқори товушда фойдаланиш қулоқда шанғиллаш, эшитишнинг пасайиши, бош оғриғи ва чарчоқ каби ҳолатларга олиб келиши мумкин.
Бундан ташқари, қулоқ ичига тақиладиган қулоқчинлар узоқ вақт ишлатилганда қулоқ йўлида намлик ва бактериялар кўпайишига сабаб бўлиши эҳтимоли бор. Бу эса айрим ҳолларда қулоқ яллиғланиши, қичишиш ёки ноқулайлик келтириб чиқаради. Шунинг учун қулоқчинларни тоза сақлаш ва бошқалар билан алмашиб ишлатмаслик муҳим.
“Zamin”ни Telegram'да ўқинг!
