Тавба қиламан

Бу дунёда Ҳақдан устун киши йўқдир,
Тавба-тавба, Биру Борим, қабул этгил.
Тафаккур бер, бизга англат, бизга уқтир,
Тавба-тавба, Биру Борим, қабул этгил.

Юзим икки, сўзим икки, Сенга борсам,
Бошга қайғу келса Сени ёдга олсам,
Биру Борсан, Раҳмли Зот, Раҳнамосан,
Тавба-тавба, Биру Борим, қабул этгил.

Кими ғафлат босиб ётгай, кими уйғоқ,
Кими кўнгли қора, кимин қалбидир оқ,
Шафқатингга турурмиз биз фақат муштоқ,
Тавба-тавба, Биру Борим, қабул этгил.

Зулм кўрсак, бўйин эгдик, тупроқ бўлдик,
Қамчи тегса, қилич келса кўпроқ бўлдик,
Тилимиз йўқ, қўлимиз йўқ, ўлмай ўлдик,
Тавба-тавба, Биру Борим, қабул этгил.

Қўлга тегса давлат магар, қутурганмиз,
Бирор қулнинг елкасида ўтирганмиз.
Тупроқлик ҳам эсдан чиқиб кўпирганмиз,
Тавба-тавба, Биру Борим, қабул этгил.

Мадҳигўймиз бандаларга, Холиқ қолди,
Ғолиб зотлар бу қулликка солиқ солди,
Билолмасман ким йўлинда солиҳ қолди,
Тавба-тавба, Биру Борим, қабул этгил.

Ҳолимизга на йиғлаб, на кулиб бўлгай,
Мазлум этин золим каслар юлиб бўлгай,
Бу хўрликда на ўриндан туриб бўлгай,
Тавба-тавба, Биру Борим, қабул этгил.

Ичга ютдик, Ягона зот, дод этмадик,
Ўлиб бўлган руҳимизни шод этмадик,
Ғафлат кечиб, кечир, сени ёд этмадик,
Тавба-тавба, Биру Борим, қабул этгил.

Буюк Қодир, шафоат бер мардумларга,
Ва иймон бер биздан кетган марҳумларга.
Бутун етказ, ҳисоб берилар Кунларга,
Тавба-тавба, Биру Борим, қабул этгил.

Ё Аллоҳим, тавбамизни қабул этгил.

Манба: Azon.uz “Замин” янгиликларини “Инстаграм”да кузатиб боринг