Нима учун араб хурмосини ширинлик ўрнига истеъмол қилиш тавсия қилинади?

^{Фото: Harper’s Bazaar}
Шакар организм учун зарарли бўлгани сабаб дунё парҳезшунослари ундан воз кечиш ёки ҳеч бўлмаганда кам миқдорда истеъмол қилиш кераклигини таъкидлайди. Мазали ва фойдали моддаларга бой бўлган араб хурмосини шакар ўрнига истеъмол қилиш тавсия қилинади.

Қуритилган хурмонинг фойдаси нимада?
Қуритилган хурмо ўсимлик оқсили, клетчатка, B гуруҳи витаминлари ҳамда суяк ва қон томирлар саломатлиги учун муҳим бўлган K витаминининг кони ҳисобланади. Бундан ташқари, организм фаолияти учун аҳамиятли бўлган кальций, калий, магний, рух ва темир микроэлементларини ҳам ўз ичига олади.

Таркибидаги каратиноид ва полифенолларнинг миқдори кўплиги сабаб эса организмни зарарланишдан сақлайди. Ундаги табиий антиоксидантлар организмда оксидланиш, яллиғланиш ва эрта қариш жараёнининг олдини олибгина қолмай, организмни ультрабинафша нурларидан ҳимоя қилади.

Клетчаткалар миқдорининг кўплиги сабаб хурмони мунтазам равишда истеъмол қилиш ҳазм жараёнини, ичаклар пересталтикасини яхшилайди ва ошқозон-ичак касаллигининг олдини олади. Қолаверса, мазкур мева юрак фаолияти учун ҳам фойдали. Унда K витамини мўл экани сабаб қон-томирлар деворини мустаҳкамлайди, таркибидаги моддалар организмда «яхши» холестерин ишлаб чиқарилишини яхшилаб, «ёмон» холестеринни камайтиради.

Қандай зарари бор?
Қуритилган хурмо заҳарли ва организм учун зарарли бўлган моддаларни ўз ичига олмайди, лекин унинг истеъмолида ҳам эътибор бериш керак бўлган жиҳатлар йўқ эмас. Биринчидан, бошқа маҳсулотлар сингари у ҳам аллергия келтириб чиқариш мумкинлигини инобатга олиш керак. Иккинчидан эса етарлича калорияга эга мева бўлгани учун истеъмол қилганда калориянинг кунлик меъёрига амал қилиш лозим. “Замин” янгиликларини “Twitter”да кузатиб боринг