Ўзбекистонда крипто-активлар бўйича провайдерлик қилиш учун 9 та лицензия берилди

^{Фото: Google Images}
Ўзбекистонда 2023 йилда крипто-активлар айланмаси соҳасида провайдерлик фаолиятини амалга ошириш учун 9 та лицензия, шу жумладан, битта крипто-биржа, иккита крипто-депозитарийлар ва олтита крипто-дўконларга лицензия берилди. Бу ҳақда Истиқболли лойиҳалар миллий агентлиги маълум қилди.

Қайд этилишича, ўтган йили крипто-активлар айланмаси соҳасида провайдерлик фаолиятини амалга оширувчилар томонидан 36,2 миллиард сўм миқдорида давлат божи ва йиғимлари келиб тушган.

Капитал бозори соҳасида 2023 йилнинг охирги 3 ойида агентлик томонидан 7 триллион 905 миллиард сўмга тенг миқдорда акциялар ва 65 миллиард сўмга тенг миқдорда облигациялар чиқарилиши ўрнатилган тартибда давлат рўйхатидан ўтказилган.

Хусусан,

• “Ўзбектелеком” АЖ устав капитали 6,4 миллиард сўмга оширилиб, акциялар 6 минг сўмдан 10 минг сўмга қадар оралиғида сотувга қўйилди, натижада 33 миллиард сўм миқдорида инвестициялар жалб этилган;
  
• “Ўзбекинвест” АЖ устав капитали 14 миллиард сўмга оширилди;
  
• оммавий IPO ўтказилиши мақсадида “Ўзбектелеком” АЖ ҳамда “Ўзбекинвест” АЖ акциялари чиқарилиши давлат рўйхатидан ўтказилди ҳамда маҳаллий фонд бозорида жойлаштирилган.
  

Миноритар акционерлар ҳуқуқ ва манфаатларини ҳимоя қилиш доирасида фақатгина 2023 йил 4-чорагида уларга 1,2 миллиард сўмлик дивидендлар тўланиши таъминланди.

Эслатиб ўтамиз, 2023 йил 1 январдан эътиборан Ўзбекистон фуқаролари ва юридик шахслар крипто-активлар билан боғлиқ операцияларни фақат миллий провайдерлар орқали амалга оширилиши белгиланган. “Замин” янгиликларини “Telegram”да кузатиб боринг