Ўзбекистонда тўланмаган солиқлар миқдори 8,5 триллион сўмни ташкил этмоқда. Бу ҳақда 1 апрель куни Тошкент шаҳрида журналистлар билан бўлиб ўтган учрашувда Солиқ қўмитаси раиси биринчи ўринбосари Мубин Мирзаев маълум қилди.
Унинг сўзларига кўра, жорий йилда муддати ўтган солиқ қарзлари 10 фоиздан ошмайди.
“Бугунги кунда 8,5 триллион сўмлик тўланмаган солиқлар мавжуд. Март ойида биринчи марта қарзлар 140 миллиард сўмга камайтирилди. Умуман олганда, 2024 йилда солиқ қарздорлиги маълум даражада ошди, аммо биз буни назорат остига олиш ва 2025 йилда 10 фоиздан оширмаслик бўйича қатъий режалар тузганмиз”, — деди қўмита вакили.
Ишлаб чиқариш ва қурилиш соҳаларидаги қарздорлик
Солиқ қўмитаси маълумотларига кўра, 2025 йил 1 март ҳолатига кўра, 100 миллион сўмдан юқори солиқ қарзига эга бўлган ишлаб чиқариш корхоналари сони 978 тани ташкил этади. Уларнинг умумий қарзи 1,3 триллион сўмдан ошади. Шунингдек, ушбу қарзнинг 385,5 миллиард сўми (28,2 фоизи) фақатгина 10 та йирик корхона ҳисобига тўғри келади.
Қурилиш соҳасида ҳам вазият шунга ўхшаш. 100 миллион сўмдан юқори солиқ қарзига эга бўлган қурилиш корхоналари сони 1091 тани ташкил этади. Уларнинг умумий қарзи 1,1 триллион сўмдан ошган. Бунинг 506,1 миллиард сўми (42,7 фоизи) эса энг йирик 10 та корхона зиммасига тушади.
Жисмоний шахслар ва ходимлар қарздорлиги
2025 йил 1 январь ҳолатига кўра, мамлакатдаги 129 099 та ташкилотнинг 441,2 мингдан зиёд ходимида 337,9 миллиард сўм миқдорида тўланмаган солиқ қарзи мавжуд.
Шу жумладан:
- Ер солиғи – 210,1 миллиард сўм;
- Мол-мулк солиғи – 127,8 миллиард сўм.
Шундан:
- 62,4 миллиард сўм давлат бюджет ташкилотлари ходимларига,
- 10,3 миллиард сўм нодавлат-нотижорат ташкилотлари ходимларига,
- 265,2 миллиард сўм эса тижорат ташкилотлари ходимларига тўғри келади.
Солиқ қўмитаси қарздорликни камайтириш бўйича тегишли чоралар кўришни режалаштирган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
