Чет эл валюталарининг янги қиймати эълон қилинди

Марказий банк 29 апрелдан бошлаб амал қиладиган янги валюта курсларини эълон қилди. Унга кўра, АҚШ доллари 9,04 сўмга арзонлаб, 12 948,10 сўмни ташкил этди. Евро эса 6,38 сўмга пасайиб, 14 696,09 сўм бўлди. Россия рубли эса бироз кўтарилиб, 0,37 сўмга қимматлаб, 156,93 сўм этиб белгиланди.

Эслатиб ўтамиз, бундан аввал АҚШ доллари кетма-кет уч кун мобайнида қимматлашиб, 12 957,14 сўмга етган эди. Валюталар курсининг бундай тебраниши жамоатчиликда турли мулоҳазаларни пайдо қилмоқда.

Айрим иқтисодчи экспертларнинг фикрича, Ўзбекистонда хорижий валюталар курси сунъий равишда ушлаб турилибди ва агар курс эркинлаштирилса, бир АҚШ доллари қиймати 20 минг сўмгача ошиб кетиши мумкин. Бу эса бозордаги нархлар ўсиши ва иқтисодий беқарорлик хавфини юзага келтириши мумкин бўлган вазият ҳисобланади.

Бироқ Марказий банк бундай қарашларга қўшилмаслигини билдириб, валюталар курсининг бозор тамойиллари асосида шаклланаётганини ва сунъий тарзда ушлаб туриш каби ҳолатлар йўқлигини алоҳида таъкидлади.

Иқтисодчилар фикрича, 2025 йилнинг қолган ойлари мобайнида доллар курсида кескин тебранишлар кузатилмаслиги мумкин, аммо ташқи омиллар таъсирида кичик ўзгаришлар содир бўлиб туриши табиий ҳол. Айниқса, экспорт-импорт балансининг ўзгариши, ташқи иқтисодий вазиятдаги инқироз ёки глобал бозордаги иқтисодий ўзгаришлар валюта курсларининг кўтарилиши ёки пасайишига сабаб бўлиши мумкин.

Шу сабабли мутахассислар аҳоли ва тадбиркорларни иқтисодий вазиятни диққат билан кузатиб боришга ва эҳтимолий тебранишларга тайёр бўлишга чақирмоқда. Хорижий валюталар курсларининг ўзгаришига эътиборли бўлиб, иқтисодий хавф-хатарларни минималлаштириш учун эҳтиёткорлик чораларини кўриш мақсадга мувофиқдир. «Замин»ни Telegram’да ўқинг!