Lego компанияси 2025 йилнинг дастлабки олти ойини улкан муваффақият билан якунлади. Хабарларга кўра, компаниянинг даромади 12 фоизга ортиб, ўзининг тарихий максимуми — 5,4 миллиард долларга етди. Бу кўрсаткич Lego учун энг юқори ярим йиллик натижа сифатида қайд этилди.
Компаниянинг ўйинчоқ конструкторлари қатори ҳам сезиларли даражада кенгайди. Фақатгина шу давр мобайнида уларнинг ассортименти рекорд даражада — 314 тага кўпайди. Шунингдек, йилнинг биринчи ярмида Lego дунё бўйлаб яна 24 та янги дўкон очишга улгурди.
Даромад ўсишига айниқса гуллар ва хона ўсимликлари кўринишидаги ўйинчоқлар, шунингдек Formula-1 миниатюра автомобиль тўпламлари катта ҳисса қўшди.
— Бу тарихимиздаги энг яхши биринчи ярим йиллик натижа. Даромадда ҳам рекорд, операцион фойдада ҳам рекорд, соф фойдада ҳам рекорд… Жуда хурсандмиз, — деди Lego бош директори Нилс Кристиансен CNBC нашрига берган интервьюсида.
Компания сўнгги йилларда маҳсулот турларини мунтазам кенгайтирмоқда. Эндиликда уй интерьери учун тўпламлар, деворий мозаикалар, турли декоратсия жиҳозлари ҳам Lego ассортиментидан жой олган. Шу билан бирга, компания янги лицензия ҳамкорликларини йўлга қўйди. Жумладан, “Bluey” болалар анимацион сериали ва “One Piece” анимеси асосида тўпламлар ишлаб чиқилди.
Энг йирик қадамлардан бири — Pokemon билан кўп йиллик ҳамкорликдир. Унга кўра, Pokemon тўпламлари 2026 йилдан бошлаб дўконларга чиқиши кутилмоқда.
Муттахассислар фикрича, Lego ўзининг инновация ва ижодкорликка йўналтирилган сиёсатини давом эттирар экан, компаниянинг келгуси йилларда ҳам ўсиши барқарор бўлиши мумкин.
«Замин»ни Telegram’да ўқинг!
