Миллий статистика қўмитаси эълон қилган янгиланган рақамларга қараганда, 2025 йилнинг январ–октябр ойлари давомида мамлакатимизда кўрсатилган бозор хизматлари қиймати 818,5 триллион сўмга етди. Бу кўрсаткич хизматлар соҳаси иқтисодиётнинг энг тез ўсувчи тармоқларидан бирига айланганини яна бир бор тасдиқлаб турибди.
Ҳудудлар бўйича тақсимотга эътибор қаратилса, ҳар бир вилоятда бу йўналиш босқичма-босқич кучайиб, маҳаллий иқтисодий фаолликни ошираётгани кўзга ташланади:
Қорақалпоғистон Республикаси — 26,9 трлн сўм
Андижон вилояти — 42 трлн сўм
Бухоро вилояти — 33,3 трлн сўм
Жиззах вилояти — 19,2 трлн сўм
Қашқадарё вилояти — 41,7 трлн сўм
Навоий вилояти — 20,2 трлн сўм
Наманган вилояти — 42 трлн сўм
Самарқанд вилояти — 60,3 трлн сўм
Сурхондарё вилояти — 27,5 трлн сўм
Сирдарё вилояти — 11,3 трлн сўм
Тошкент вилояти — 55,3 трлн сўм
Фарғона вилояти — 55,5 трлн сўм
Хоразм вилояти — 28,4 трлн сўм
Тошкент шаҳри — 312,2 трлн сўм
Маълумотлардан кўриниб турибдики, хизматлар бозорининг «локомотиви» ҳали ҳам Тошкент шаҳри ҳисобланади. Пойтахт мутлақ устунликка эга бўлиб, ягона ўзи мамлакатдаги умумий хизматлар ҳажмининг катта қисмини бераётгани билан ажралиб туради. Ундан кейинги поғоналарни Самарқанд, Фарғона ва Тошкент вилоятлари эгалламоқда — бу ҳудудларда хизматлар инфратузилмаси, савдо марказлари, транспорт алоқалари ва саноат фаолияти фаол ривожланяпти.
Мутахассисларнинг таъкидлашича, пойтахтда хизматлар сектори жадал суръатда ошишининг асосий сабаби — аҳоли жуда зич бўлган минтақа сифатида истеъмол бозори ҳам йирик. Шунингдек, бизнес марказлари, молиявий ташкилотлар, савдо мажмуалари, турли сервис хизматлари ва инновацион стартаплар айнан шу ерда жамланган. Буларнинг барчаси Тошкентда хизматлар тўқимасини янада кучайтириб, иқтисодий ҳаракатни катта айланмага солмоқда.
Юртнинг бошқа ҳудудларида ҳам бу соҳанинг ўсиши кутилмоқда. Чунки қисқа муддатда инфратузилма янгиланиши, янги хизмат турларининг кириши ва рақамли сервисларнинг кенгайиши бозор манзарасини мутлақо ўзгартириб, рақобатни кучайтиради.
Соҳадаги ўсиш тенденцияси шундан даракки, хизматлар сегменти яқин йилларда миллий иқтисодиётнинг энг даромадли ва жонли йўналишларидан бирига айланиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
