АҚШ ва Исроилнинг Эронга қарши сўнгги ҳарбий операциялари ортидан жаҳон нефть нархлари кескин кўтарилди. Брент маркали нефтнинг бир баррель учун нархи яна 100 долларлик чегарадан ошиб, глобал энергия бозорида кескин ўсишни қайд этди. Бу ҳақда Tengrinews.kz хабар беради.
Сўнгги савдо маълумотларига кўра, Лондоннинг ICE биржасида Брент маркали нефтнинг май ойидаги фьючерслари 14 фоиздан кўпроққа сакраб, бир баррель учун 100 доллардан бемалол ошиб кетди. Худди шундай, WTI маркали нефтнинг апрель ойидаги фьючерслари ҳам 14 фоизга сезиларли даражада ўсиб, бир баррели 95,18 долларга етди.
Бу сўнгги кескин ўсиш шу ой бошидаги ўзгарувчан даврдан кейин юз бермоқда. 9 март куни нефть нархи 2022 йилдан бери биринчи марта 100 доллардан ошди ва Ҳурмуз бўғози орқали таъминотнинг узилиши қўрқуви туфайли 116 ва 119 доллар оралиғида энг юқори кўрсаткичга чиқди. Ушбу сўнгги эскалациядан олдин нархлар қисқа муддатга пасайган эди.
Соҳа мутахассисларининг таъкидлашича, нефть нархининг кўтарилиши Қозоғистон каби нефть экспорт қилувчи мамлакатлар учун қўшимча даромад келтириб, уларнинг миллий жамғармалари ва валютасини мустаҳкамласа-да, бозордаги юқори ўзгарувчанлик жиддий иқтисодий хавфларни келтириб чиқаради. Нархларнинг ўзгариб туриши инфляция даражасига, инвестиция оқимларига ва умумий молиявий барқарорликка кучли таъсир кўрсатиши мумкин. Маълумот учун, Қозоғистоннинг 2026-2028 йилларга мўлжалланган давлат бюджети бир баррель учун 60 доллар миқдоридаги консерватив ҳисоб-китоб асосида ишлаб чиқилган.
“Zamin”ни Telegram'да ўқинг!
