06:00 / 03.02.2024

Зоир Мирзаев: “Валламатинг бўлса ҳам, мурожаатчи учун ишдан оламан”

^{Фото: Тошкент вилояти ҳокимлиги}
Тошкент вилояти ҳокими Зоир Мирзаев вилоятдаги давлат ташкилоти раҳбарларига мурожаат қилиб, муаммоси ечимини кутаётган фуқаро мурожаатлари билан шахсан раҳбарларнинг ўзи шуғулланиши кераклигини, мурожаатчи шикоятига ечим топилмаса, раҳбарларни шу сабаб ишдан олишини айтди.

"Мурожаат учун ишдан олиб ташлайман. Валламатинг бўлса ҳам, бунақа тажрибанг менга кўринмайди. Бирорта мурожаат эътибордан четда қоладиган бўлса, муддати бузилган бўлса, фуқаро ундан норози бўлса, ёки уни бориб кўрди-ю, ҳал қилмаган бўлса, масалан Оҳангарон шаҳрида муаммони бориб ўрганган, фуқаронинг моддий ҳолати яхши бўлгани учун мурожаатини рад қилган. Аммо мурожаатчига бу ҳақда айтмаган. Мурожаатчи эса бизга ‘келиб расмга туширишди, лекин ҳеч қандай жавоб бермади’ деяпти.

Лозим топилмаган бўлса, буни мурожаатчига айтиб, тушунтириш керак-да. Қабулда ҳар хил нарсалар бўлди. Кимдир қизининг сарпосига ҳам пул сўрайди. Ўрганиш керак бунақа ҳолатларда. Кимнингдир ейдиган овқати бўлмаган пайтда мен сарпога пул бериб турсам, бу тепага ҳам, пастга ҳам, қонунга ҳам, Яратганнинг ўзига ҳам маъқул келмайди. Жойида айтиш керак, моддий ёрдамга муҳтож бўлмаса, биз сизга беролмаймиз деб", — деди ҳоким.

^{Фото: Тошкент вилояти ҳокимлиги}

^{Фото: Тошкент вилояти ҳокимлиги}
Вилоят ҳокимлиги ахборот хизматининг билдиришича, Нурафшон шаҳрида бўлиб ўтган сайёр қабулда 126 нафар фуқаронинг 200 дан ортиқ мурожаати ўрганилиб, уларга ижобий ечим топиш бўйича тегишли бошқарма, муассаса, корхона ва ташкилотлар раҳбарларига аниқ топшириқлар берилган.

^{Фото: Тошкент вилояти ҳокимлиги}
"Мазкур мурожаатларнинг аксарияти уй-жой, моддий ёрдам, ишга жойлашиш, соғлиқни сақлаш каби масалаларга оид бўлиб, кўпчилиги жойида ечимини топди. Бу каби сайёр қабуллар келгусида вилоятнинг бошқа ҳудудларида ҳам давом этади", — дейди ҳокимлик ахборот хизмати раҳбари Беҳзод Қобулов.