Олмалиқда темир конструкциялар қулаб тушиши оқибатида 3 ҳиндистонлик ҳалок бўлди

^{Фото: Видеодан кадр}
Тошкент вилояти Олмалиқ шаҳар саноат зонаси ҳудудида жойлашган янги қурилаётган «3-сонли мисни бойитиш фабрикаси»да темир конструкциялари кучли қор ёғиши натижасида қулаб тушди.

Фавқулодда вазиятлар вазирлиги хабарига кўра, бугун, 20 феврал куни соат тахминан 08:00 ларда Олмалиқ шаҳар саноат зонаси ҳудудида жойлашган янги қурилаётган «3-сонли мисни бойитиш фабрикаси»да бирламчи маълумотга кўра темир конструкциялари сурункали қор ёғиши натижасида қулаб тушган.

Содир бўлган бахтсиз ҳодиса натижасида воқеа жойида қурувчи компаниясининг 32 нафар ишчилари (барчаси Ҳиндистон Республикаси фуқаролари) жабрланган, улардан 3 нафари воқеа жойида вафот этган, 29 нафари турли даражадаги тан жароҳатлари олганлиги сабабли шифохонага жойлаштирилган. Жабрланган фуқароларнинг 4 нафарига шифохонада зарур тиббий ёрдам кўрсатилиб жавоб берилган.

Айни вақтда содир бўлган ҳодиса сабаблари ва оқибатларини жойида ўрганиш, зудлик билан бартараф этиш, жабрланганларга ёрдам кўрсатиш мақсадида масъул ташкилотлар иштирокида ишчи гуруҳи тузилган. “Замин” янгиликларини “Telegram”да кузатиб боринг