ТИВ собиқ раҳбарининг ўғли яна бир йирик компанияни сотиб олди

Бир муддат аввал Ўзбекистондаги энг номдор қурилиш компанияларидан «Трест-12» АЖ Давактив томонидан хусусийлаштириш номи остида сотувга қўйилган эди.

Агентликнинг маълум қилишча, компанияни «сотиб олиш бўйича қизиқиш билдирган 4 нафар хорижий ва маҳаллий инвесторлардан аризалар қабул қилинган».

Бироқ белгиланган муддатларда Консультант («Deloitte» консалтинг компанияси)га компанияни сотиб олиш бўйича 2 нафар талабгордан таклиф келиб тушган ва 111 млрд сўм миқдоридаги энг юқори харид баҳосини таклиф қилган «Delta Global Dynamics» МЧЖ савдо ғолиби деб топилди.

Шу тариқа «Delta Global Dynamics» МЧЖ «Трест-12» АЖ устав капиталидаги 51,12 фоиз давлат улушига эгалик ҳуқуқини сотиб олган.

Ғолиб харидорга 2 йил мобайнида компанияда мавжуд иш ўринларини ва ишчилар сонини сақлаб қолиш (табиий сабаблар билан бўшайдиган иш ўринлари бундан мустасно), амалдаги иш ҳақи фонди миқдорини камайтирмаслик ва жамоа шартномаси шартларини ёмонлаштирмаслик каби шартлар қўйилган.

Эслатиб ўтамиз, «Delta Global Dynamics» МЧЖ 100 фоизлик улуш билан Ўзбекистон ТИВнинг собиқ раҳбари Абдулазиз Камиловнинг ўғли – Комилов Дониёр Абдулазизовичга тегишли ҳисобланади.

Аввалроқ, унинг «PETROLEUM TECHNOLOGY GROUP» крмпанияси «UNG Petro» МЧЖнинг 100 фоиз улушини сотиб олгани ҳақида хабар берилган эди.

Бундан ташқари, 2021 йилда кичик Комиловга тегишли «METROPOL GROUP» МЧЖ Тошкент шаҳридаги Сайилгоҳ кўчасида жойлашган собиқ МХХнинг «Марказий бино»сини 210 миллиард сўмга сотиб олган.

Маълумот учун, «Трест-12» АЖ Ўзбекистондаги энг номдор қурилиш компанияларидан бири бўлиб, 1979 йилдан буён фаолият олиб бормоқда. Компания катта қурилиш лойиҳаларини мустақил равишда амалга ошириш имкониятига эга бўлган техникалар паркига эга.

Трест бир неча ўнлаб муҳим объектлар қурилишларини амалга оширган, улар орасида жамоат бинолари (Ўзбекистон Республикаси Вазирлар Маҳкамаси ва вазирликлар бинолари, Миллий кутубхона, Минор масжиди ва бошқалар), саноат объектлари (шу жумладан GM Powerstation заводи), Hyatt Regency меҳмонхона мажмуаси, Westminster университети ва бошқалар бор. Ҳозирги вақтда Трест 2021 ва 2022-йилларга мўлжалланган катта қурилиш ишлари буюртмаларига эга, Халқаро Ислом маркази, Жиззах ЭИЗда автомобил йиғиш заводи, Тошкент шаҳридаги қатор турар жой мажмуалари, Ўзбекистоннинг Қозоғистондаги элчихонаси қурилиши ва бошқалар шулар жумласига киради. “Замин” янгиликларини “Telegram”да кузатиб боринг